UBUTUMWA BWA ROHO W’IMANA BWO KU WA 21 UGUSHYINGO 2025
Nururukanye imbaraga zanjye zidahangarwa ndi Roho w’Imana mu buzima bwa Kiremwa Muntu, nje mbasanga kugira ngo mbasanganize urukundo rwanjye ruhoraho ; nimubeho muri jye iteka ryose munezezwe no kwibanira nanjye, kuko nje mu buzima bwanyu kugira ngo ndusheho kubagaragariza imikorere yanjye, ibikorwa byanjye bitavogerwa ; nje kubuzuriza, kubasendereza ndetse no kubambika imbaraga z’igisagirane, kugira ngo mvugurure kandi ndusheho kubaha igikwiriye kandi igitunganye, mbakomeze mu rugendo kuko mbayoboye ku rugamba, mbarangaje imbere nk’intwari ku rugamba mu buryo bukomeye kugira ngo mbatsindire kandi mbageze aheza ; nimumenye icyo nanga mucyange kandi mumenye icyo nkunda mugikunde, kuko nje gukomanga ku mutima wa buri wese ndetse no ku rugi rwa buri wese kuko nifuza kwinjira kandi kwisanzurira muri mwe ; nimwaguke imitima yanyu kuko nje kubagura kandi nje kubarema bundi bushya, bityo nkaba nururukanye imbaraga zanjye z’ikibatsi gitagatifu cy’urukundo, kugira ngo ngurumanishe ikibatsi muri mwe bityo kibafashe gukomera ndetse no gukomeza urugendo.
Nje kubuzuza umwuka wanjye kugira ngo iteka ryose muhumeke jye, kandi ibikorwa byanjye byigaragarize muri mwe ; nje kubavugururamo ingabire zanjye kugira ngo mbongerere imbaraga mu rugendo, kandi nje kubasobanurira byose, kuko ndi umusobanuzi w’ibidasobanutse ; nje kubarwanirira kandi nje kubaha icyo kuvuga ndetse n’icyo gukora, ari nayo mpamvu nje kubamara ubwoba ngira nti : « Ntimuhungabane kandi ntimukangarane, ntimuterwe ubwoba n’ibikorwa by’umwanzi kuko namutsinze kandi namuribase mu bubasha bwanjye buhoraho ».
Twururutse mu buryo bwacu, twururutse nk’Ubutatu Butagatifu twunze ubumwe mu buryo buhoraho, kuko ibikorwa byacu byigaragaza kandi urukundo rwacu rugahoraho iteka mu batwemera kandi mu batwizera, nimuhumurizwe kandi mukomezwe mu rugendo rwanyu kuko ibikorwa murimo ari ibikorwa by’ubutwari kandi urugendo murimo akaba ari urugendo rubaganisha aheza, ntimwiyoboye ndabayoboye kandi ntimwivugira ndabavugira, kuko iteka ryose mbaha icyo gukora kandi nkabaha icyo kuvuga igihe mugeze mu kaga ; ndi kumwe namwe mu rumuri rwinshi kugira ngo mbereke uwo ndiwe muri mwe, ndetse mbereke n’aho ibikorwa byacu bigeze mu buryo bwo kubaha icyerecyezo ndetse no kubinjiza mu Isi Nshya igomba kubaho mu bikorwa bishya, ndetse no mu buryo bushya ; nimunyamabare kandi mwambare Kristu mu buzima bwanyu bwa buri munsi, iteka ryose munezezwe no kwibanira nanjye ubuziraherezo.
Ndi Roho-Muyobozi kuko iyo nje gukora ibikorwa byanjye birigaragaza kandi abo nyoboye ntibahungabana, ntibayoba amayira kandi ntibatana kuko mbayobora mu gikwiriye ndetse no mu gitunganye ; mutamfite ntacyo mwaba muri cyo kuko ari jye ubayoboye kuko iyo ntabayoboye muba muyobowe n’umwanzi, kandi akabayobora mu mwijima ; iteka ryose rero nimuntabaze ndabatabara kandi mwishimire ko mbana namwe kuko ntabagikanywa rero n’ikibi niyo mpamvu nza nsenya nkarimbura kandi ngahigika, nkakora umukwabu mu buryo bukomeye kugira ngo umwanzi ampigamire.
Nimubeho rero iteka ryose mu rukundo rwa DATA bityo muvugururwemo imbaraga zanjye, kandi iteka ryose mushimishwe n’aho ibikorwa byacu bigeze muri mwe ndetse n’aho buri wese ari gutera intambwe yerekeza kuko aho turi kubaganisha ari aheza ; erega tuzi urugamba mwarwanye kuko mwatwemereye tukagendana kandi tugakorana imirimo n’ibitangaza, nimuhumure ibyiza bibateganyirijwe birahari kandi biracyaza, kuko ibyo muri kubona ari bike ibibazigamiwe ari byo byinshi ; nimukotane rero kugira ngo ikiri icyiza gikomeze giture muri mwe, kandi iteka ryose urumuri rw’Imana rukomeze rubarasirizeho ; nanjye rero ndi muri mwe mu buryo bwuzuye nk’umuyobozi kandi nk’umugenga w’ibiboneka n’ibitaboneka, kugira ngo mbigishe kandi mbavugururemo imbaraga zibakomeza mu rugendo murimo ; nzi neza ko hari byinshi uhura nabyo bibavuna kandi bibananiza, ariko kandi sinjya mbatererana kuko mbashoboza byose, yewe n’aho ibyo mutabasha gukora nkabibakorera kuko unyemereye turagendana kandi tugakorana imirimo n’ibitangaza ; twururutse rero mu bubasha bwacu kugira ngo tuvugurure Ikiremwa Muntu aho kiva kikagera, kandi twuzuze ububasha bwacu mu buryo bukomeye buri wese ; nimukomere rero kandi mukomeze urugendo kuko ndi kumwe namwe mu buryo bwuzuye, nimwambare imbaraga kandi mukenyere mukomeze kuko ububasha bw’Ijuru bukomeje kubereka icyerekezo ndetse no kubereka aho mugana.
Simpwema kubagaragariza urukundo rwanjye kandi simpwema kubagaragariza impuhwe zanjye z’igisagirane, kuko mbaha ibyishimo kandi nkabahaza amahoro n’urukundo ; nje kuvugurua byinshi cyane cyane kugira ngo mubeho mu rukundo kuko ikitari urukundo kigomba gusibwa no gusibangana, ari nayo mpamvu twururutse mu Isi mu bubasha bwacu kandi mu mbaraga zacu zidasigaza ibikorwa by’umwanzi ahubwo zikubura zikesha kandi zikamagana burundu ibikorwa by’umwijima ; ndi ku rugamba rwanjye rero nifatikanyije namwe mu buryo bwuzuye kuri uyu munsi kugira ngo tuzamure roho nyamwinshi kandi zose tuzerekeze mu rumuri rwa DATA, kuko twunze ubumwe mu bubasha bw’Ubutatu Butagatifu, ntidutandukana kandi ntiduhuzagurika kuko ibikorwa byacu bigendera icya rimwe kandi icyo dushaka tukagikora mu bubasha bwacu butegeka kandi buhagarika ibitari ku murongo, tukaba tuje rero gukubura kandi kunyuguza mu buryo bufatika kugira ngo duhangane n’ibikorwa byose by’umwijima.
Sekibi yaribeshye ashuka Muntu, Muntu na we aribeshya yibwira ko ari kugendera mu mucyo kandi ari kugendera mu mwijima, benshi birutse inyuma y’ibishashagirana ariko kandi birengagiza icy’ingenzi cya ngombwa bagomba kubamo kandi bagomba kwakira, iki ni igihe rero cyo gusobanurira Muntu uwo agomba kuyoboka ndetse n’uwo agomba kubaha, kuko nta kindi Muntu tumwifuzaho kitari ukutwumvira, kutuyoboka ndetse no kugendera mu gushaka kwacu ; ugushaka kwa Muntu twagukuyeho burundu kugira ngo dukureho cyane cyane ibiterashozi ndetse n’ubwikuze bwa Muntu bwatumye yishyira hejuru, tuje gucisha bugufi rero kandi tuje kuribata cyane cyane ibikorwa by’umwijima kugira ngo urumuri rwacu ruganze.
Biremwa byacu rero kandi Ntore zacu dutaramanye, Ntumwa kandi mwatowe mugatoranywa, tukagendana kandi tugakorana imirimo n’ibitangaza, nimuhumure kuko urumuri rwanjye ruri kumwe namwe, imbaraga zanjye zibaha icyo gukora, ububasha bwanjye bukabategeka icyo mubamo ndetse bukabereka n’icyo mugomba kuvuga igihe cya nyacyo ; ntimugahungabane kandi ntimugakangwe na biracitse, yemwe n’imitontomo y’intare ntikababuze gutambuka cyangwa ngo ibabuze guhumeka ; erega ndabahagarikiye nk’umwami kandi ndabakomeje nka Roho w’Imana mu bubasha bwanjye, turi kumwe namwe mu mbaraga zacu zidahangarwa, twarurutse kugira ngo turwanirire abacu, nimuhumure kuko aho ndi integuro yanjye irigaragaza, simbangikanywa n’ikibi n’umwijima ahubwo aho nganje urumuri ruratama, ibyishimo amahoro n’umunezero bikaganza ; ngibyo rero ibyo naje kubaka mu Isi, ngibyo ibyo naje kubaka mu banjye, ibyo naje kubaka mu bo nigaragarije mu bo tugendana, mu bo dukorana, mubo tuvugana ndetse no mu bo tuganira.
Nimuhumure turi kumwe, nimukomere ndahari kandi nimuhumurizwe kuko ububasha bwanjye bwururutse, ndi kugenda ntagatifuza byose, ndi kugenda ncangura, ndi kugenda nshyira ku murongo, simvuguruzwa ku ijambo, ijambo ryanjye ni ukuri ; nimuribemo rero kandi muryinyagamburiremo, iteka ryose mwishimire ko ndi kumwe namwe ubuziraherezo ; mbifurije ibihe byiza, mbifurije kugubwa neza, mbifurije gukomera muri jye no muri DATA, kandi mbifurije kwakira umwuka wanjye muziranenge kugira ngo ubaturemo, ubabemo, ubashoboze byose kandi ubagaragarize byose mu bubasha bukomeye butavogerwa.
AMAHORO AMAHORO, MBIFURIJE UMUNSI MWIZA NDI ROHO MUTAGATIFU, AMAHORO IBIHE BYIZA TURI KUMWE NDABAKUNDA NTORE ZANJYE NA DATA, AMAHORO AMAHORO, NIMUGUBWE NEZA MUKOMERE KUKO NABAGENDEREYE MU BUBASHA BWANJYE BUDAHANGARWA, AMAHORO AMAHORO IBIHE BYIZA, NIMWISHIME KUKO MBAHAYE IBYISHIMO, NIMUKOMERE KUKO MBAKOMEJE, NIMWAMBARE IMBARAGA KUKO NZIBAMBITSE KANDI SIMVUGURUZWA KOKO KU CYO NAVUZE KANDI SINTESHUKA NO KUCYO NATEGUYE, AMAHORO IBIHE BYIZA TURI KUMWE NDI ROHO W’IMANA, AMAHORO AMAHORO.