UBUTUMWA BWA BIKIRA MARIYA, TARIKI YA 12 WERURWE 2025
Mbifurije kugubwa neza bana banjye, ndabakomeje kandi mbambitse imbaraga, ndabashyigikiye mu bikorwa byanyu bya buri munsi ndi Mariya Nyina w’Imana, Umwamikazi w’Ijuru n’Isi, ubakunda cyane kandi ubahora bugufi igihe cyose; nifatikanyije namwe rero mu bikorwa byo kurohora kandi mu bikorwa byo gutabara Isi ndetse n’abayituye, kuko turi mu njyana ikomeye y’ibikorwa bya DATA kandi tukaba dukomeje kugendana dutsinda kandi dutsiratsizanya ububasha bwa Nyakibi aho buva bukagera; nimukomere rero kandi murusheho gukataza ndabakunda bana banjye kandi ndabashyigikiye, kuko mwese mwese muri mu mujishi wanjye kugira ngo koko mbasindagize kandi mbasimbagize, bityo mukataze mu bikorwa byiza byo gukomeza kunsanga ndetse no gusanganira Jambo Umwana wanjye, mu rugendo rukomeje kandi mu rugendo rukomeye dukomeje kugendana cyane cyane hirya no hino ku Isi dukomeza kwigaragariza muri mwe kandi dukomeza kugaragaza imbaraga z’ububasha bwacu mu mibiri yanyu, kugira ngo koko habashe gukorwa byinshi mu buzima bw’Ikiremwa Muntu; dukomeje rero gutagatifuza Mwene Muntu aho ava akagera kandi dukomeje gutagatifuza Ikiremwa Muntu cyose aho kiva kikagera, mu kugiha urukundo rwacu koko kandi mu kurushaho kukigarura mu nzira ikwiriye kandi itunganye, kugira ngo koko cyambikwe kandi gisukurwe mu buryo bukwiriye kandi mu buryo butunganye; ni yo mpamvu rero nkomeje kugendana namwe kandi ni yo mpamvu nkomeje kwibanira namwe koko, kugira ngo koko nkomeze kubafasha gutsinda ibitero by’umwanzi aho biva bikagera kandi nkomeze kubashyigikira muri byose.
Nkomeje rero kubambika imbaraga z’ubutwari, kugira ngo koko murusheho gutwaranira muri njye no muri DATA kandi nkomeje kubambika ubudahangarwa bwanjye, kugira ngo koko mukomeze guhangamura ikibi muri Mwene Muntu; ndi intwari ku rugamba rero namwe nimube intwari kuko naje kubatoza iby’ubutwari kandi nkaba naraje kubatoza iby’urugamba kugira ngo mushishikare kandi murusheho gukora kuko hari byinshi byabazaniwe mu Isi kandi hakaba hari byinshi byatumye muriho kugeza ubu kugira ngo muhagarare koko mu mwanya w’abarambiwe kandi mu mwanya w’abarangaye, bityo muhamye iby’Ingoma ya DATA, nanjye rero ndi umuhamya muri mwe kandi ndi umuhamya w’iby’Ijuru kuko nganje mu bana banjye aho bava bakagera bari hirya no hino, kugira ngo koko nkomeze kubagaragarizamo imirimo ndetse n’ibitangaza bikomeye nkomeje gukorana n’abanjye bari hirya no hino, aho bava bakagera; uko bwije n’uko bukeye rero mporana namwe kandi nkagendana namwe muri byinshi, dukora kandi dushyira ku mugaragaro ibikorwa byose twakoze mu mbaraga z’ububasha bwacu budatsindwa.
Ntabwo rero twicaye kuko turi mu mirimo ihambaye kandi tukaba turi mu bikorwa bikomeye, byo gukomeza kugeza benshi mu mutsindo wa DATA kandi byo gukomeza gucungura Isi ndetse n’abayituye, mu kurushaho koko kunoza umugambi wa DATA mu Isi ndetse no muri Mwene Muntu, akaba ari yo mpamvu tudahwema kwigaragaza kandi akaba ari yo mpamvu tudahwema kwigaragazanya ingoga, ubutwari ndetse n’imbaraga zidasanzwe dukomeje kugaragariza mu bacu, mu bari hirya no hino, cyane cyane mu batumenye kandi muri abo bose bakomeje kwitangira urukundo rwacu, bityo rukabahihibikanya ijoro n’amanywa kugira ngo koko barusheho gukora icyiza, bagaharanira iteka kwitandukanya n’ikibi cyangwa n’amaso y’Uhoraho Imana, ahubwo iteka ryose bagahora biziritse kuri Uhoraho Imana kandi bagahora bagendera ku mategeko ye ndetse n’amabwiriza ye, abatoza gukora igikwiriye kandi igitunganye.
Ni yo mpamvu rero tutazarekura abacu bari hirya no hino cyane cyane abatumenye bemeye kwitanga wese nta na kimwe basize inyuma, bakemera kwegukira urukundo rwacu, kandi bakemera kwakira byose nta na kimwe binubiye, abo bose rero bakomeje gukomezwa n’ububasha bwacu kandi dukomeje kubaba bugufi cyane, dukomeje kubavomerera imbaraga z’ububasha budukomokaho kugira ngo koko bahagarare kandi bahamye gitwari kandi babeho koko mu gushaka kw’Imana uko bikwiriye, kandi bakomeze kugendera mu mbaraga zibafasha kwiyambura ikibi icyo ari cyo cyose aho kiva kikagera cy’umwanzi; namwe rero mukataje mu rugendo rwanyu, ndagira nti “Nimukomere kandi mukomeze urugendo, nimurusheho kwambara umwambaro w’ubutungane kuko ari wo uzabageza aho ndi kandi akaba ari wo uzabaha kubona DATA mutikanga kandi mutikandagira”.
Abari mu mwijima w’ikibi rero abo bose baragowe kuko ishyano ndetse n’amakuba bibururukiye, iki gihe rero akaba ari igihe cyo kwisukura kuri buri wese kandi akaba ari igihe cyo kwitamururaho umwijima w’ikibi aho uva ukagera kuko abanjye kandi abo ndehesha urukundo rwanjye bakaza kandi bakanyumva bwangu, abo bose nkomeje kubaba bugufi cyane, nkomeza kubarinda ndetse no kubacungira umutekano, nkomeza kubegerezayo ikibi cy’umwanzi cyose, aho kiva kikagera kugira ngo kitabagiraho ijambo kandi kitabagiraho ububasha, namwe rero bana banjye nkomeje kubarinda kandi nkomeje kubacungira umutekano, kugira ngo koko imbaraga ndetse n’ububasha bya Nyakibi bitabagiraho ijambo kandi bitabagiraho ububasha.
Ni yo mpamvu rero nkomeje kwibanira namwe kandi ni yo mpamvu nkomeje kugendana namwe muri ubu buryo budasanzwe, kugira ngo koko nsinde kandi nsiratsize imbaraga z’ibinyabubasha byose aho biva bikagera, cyane cyane izaza zishaka gushyira ubuzima bwanyu mu kaga kandi izaza zishaka kubatetereza mu murimo mwahamagariwe, izo zose nkomeje kuzihindisha ububasha bwanjye kandi nkomeje kuzibuza uburyo mu buryo bukomeye kandi nkomeje kuzima umwanya ndetse n’ibyicaro mu buzima bwanyu, kuko ubuzima bwanyu mbufite mu biganza kandi nkaba mbafite nk’abana Ijuru ryampaye kurinda ndetse no gucungira umutekano uko bikwiriye; ngaho rero nimutekanire mu rukundo rwanjye kandi nimuturize mu mutima wanjye watsinze kandi utagira inenge, kuko naguye kugira ngo buri wese yisange kandi yisanzuriremo, bityo avome kandi avomererwe ibyiza binkomokamo.
Nimugire amahoro bana banjye, ndabakomeje kandi mbashyize ku ibere ryanjye kugira ngo mwonke kandi muhazwe ibyiza by’Ijuru kuko mbituyemo bityo namwe nkaba naje kubibasangiza kandi nkaba naje kubibasabanisha kugira ngo koko mukomeze gushyirwa mu mbaraga nshya zibakomeza kandi zibashyigikira mu rugendo rwanyu rwa buri munsi; mbambitse imbaraga rero nimukomere kandi mukomere turi kumwe ku rugamba, ndi kumwe namwe mu mutsindo udasanzwe wa DATA, kuko imbaraga ndetse n’ububasha bye biganje muri mwe kugira ngo bihore iteka byigaragariza mu buzima bwanyu bwa buri munsi, nanjye rero nk’umubyeyi watsinze kandi nk’umubyeyi ubakunda, nkahora ndi bugufi ya buri wese kugira ngo nkomeze kumurinda kandi nkomeze kumucungira umutekano, nkomeze kumuhaza imbaraga z’urukundo rwanjye kandi nkomeze kumuhaza ingabire ndetse n’ingabirano, zimufasha gukataza kandi zimufasha gukomera mu rugendo uko zikwiriye; nimugire amahoro rero mbahaye umugisha wanjye wa kibyeyi kugira ngo ubashyigikire kandi ubakomeze, ubafashe kurushaho kunsanga kandi ubafashe kurushaho gusanga DATA cyane cyane mu bikorwa bishya mukomeza gukorana natwe buri munsi kandi ibihe byose; mbifurije kugubwa neza rero nimukomere kuri buri wese, mbahaye urukundo rwanjye kandi mbahaye imbaraga zanjye, zibashyigikira kandi zibakomeza mu rugendo rwanyu rwa buri munsi.
AMAHORO AMAHORO, MBIFURIJE UMUNSI MWIZA BANA BANJYE, GUKOMERA NDETSE NO GUKATAZA TURI KUMWE NDABAKUNDA, NDI MARIYA NYINA W’IMANA, UMWAMIKAZI W’IJURU N’ISI UBAKUNDA KANDI UBATARAMISHA IGIHE CYOSE, AMAHORO AMAHORO.