UBUTUMWA BWA MALAYIKA RAFAYELI, TARIKI YA 06 GASHYANTARE 2025
Ndabaramukije kandi mbifurije igitondo cyiza, igitondo gihire kandi igitondo cy’umugisha kuri buri wese, mbifurije kugubwa neza mu rukundo rwanjye n’urwa DATA, nimugume mu mahoro y’igisagirane kandi nimugume mu rukundo rwacu rutavogerwa kandi mu rukundo rwacu rutajorwa, kuko ndi rwagati yanyu kugira ngo nkomeze kubasakazaho amahoro y’igisagirane nkomora muri Uhoraho; ndi Malayika Rafayeli utaramanye namwe igitondo nk’iki ngiki kandi nje kubashyigikira, nje kubakomeza mu bikorwa byanyu bya buri munsi, kugira ngo koko murusheho kugira ireme mu by’Ijuru nta na kimwe kibatandukanyije n’urukundo Uhoraho Imana abakunda.
Nimukomere rero kuko nje kubakomeza kandi nkaba nje kubashyigikira mu bikorwa nk’ibi ngibi bidasanzwe, kugira ngo turusheho gutsinda kandi turusheho kwirukana umwanzi mu Isi ndetse no mu Kiremwa Muntu, ibikorwa byacu rero bikomeje kwigaragariza muri mwe kandi imirimo yacu idasanzwe dukomeje kuyitangariza hirya no hino ku Isi kuko dukomeje kubaka kandi tukaba dukomeje gusenyera umwanzi mu buryo bukomeye; harahirwa rero abiteguye kandi harahirwa abari maso, bakomeje kwakira imbaraga ndetse n’ububasha bikomoka muri DATA, kugira ngo bikomeze kubarinda kandi bikomeze kubasigasira, cyane cyane mu kubarinda ndetse no kubakumirira ikibi cyose cyabatandukanya n’urukundo rw’Uhoraho Imana, abo bose barahirwa kuko dukomeje kububakira amateka akomeye kandi tukaba dukomeje kubarwanirira urugamba uko bwije n’uko bukeye, nkagira nti rero “Yemwe abarangaye kandi yemwe ab’ibigwari, nimubaduke tugende kuko urugendo ari rurerure kandi urugendo rugeze ahakomeye, ni yo mpamvu rero nkomeje gushishikariza buri Kiremwa cyose kubaduka kandi kikava mu bitotsi, bityo kikegukira urukundo rwa DATA kandi kikegukira ijwi rya DATA rikomangira buri wese uko bwije n’uko bukeye.
Nkomeje rero kubahwiturira mu kibatsi cy’urukundo rwa DATA rubahwitura kandi rubahihibikanya uko bwije n’uko bukeye, kugira ngo urwumva wese yirinde kunangira umutima kandi yirinde kwica amatwi nkana, ahubwo nimwakire urwo rukundo ruza rubasanganiza impuhwe ndetse n’urukundo bityo murusigasire mu mibiri yanyu kandi murwiyubakemo uko bikwiriye kandi mugendane narwo, cyane cyane mukora icyo rubifuzaho kandi mukora icyo rubatoza ijoro ndetse n’amanywa, bityo mugendane narwo kandi mugendere mu gushaka k’Uhoraho Imana, bityo imirimo ye mureke ibiyubakire kandi mureke ibakomeze muri byose, kuko muteguriwe byinshi muri urwo rugendo ruzira ikizinga rugana Imana.
Mbifurije rero umunsi mwiza kugubwa neza turi kumwe ndabakunda, nimukomeze kugira umunsi mwiza kuko nywubifurije mwese Biremwa by’Imana dutaramanye muri iki gitondo, mbashyigikiyemo ububasha bwanjye kandi mbashyigikiyemo urukundo rwanjye kugira ngo rubakomeze kandi rubasabanishe n’Ijuru ryose kuko nanjye naje gusabana namwe kandi nkaba naje kwifatikanya namwe, cyane cyane kuri uyu munsi w’ibikorwa by’Uhoraho Imana, nibisendere kandi nibisakare mu buzima bwanyu bwa buri munsi, bityo murusheho kubakika mu buzima bwanyu bwa buri munsi; nanjye mbakomereje intambwe kandi ndabashyigikiye mu rukundo rw’Uhoraho Imana, we muyobozi kandi we mugenga w’ubuzima bwanyu bwa buri munsi.
Ngaho rero nabakomereze intambwe kandi nabashyigikire mu rukundo rwe rutajorwa kandi nabashyigikire mu rukundo rwe rutagatifu kuko ari mu ruhande rwanyu kandi akaba yiteguye kubavomerera kuri buri kimwe cyose; ngaho rero nimutege ibiganza kandi murusheho kuba maso cyane cyane kuri uyu munsi, mwitegura kandi mutega ibiganza cyane kugira ngo buri kimwe cyose mwateguriwe kidapfa ubusa kandi kitaba imfabusa muri buri umwe umwe wese; ndabashyigikiye rero kandi ndabakomeje igitondo nk’iki ngiki, nimukomere kuko muri mu burinzi bwanjye n’ubwa DATA kandi nkaba niteguye kubarwanirira muri buri kimwe cyose cyane cyane kuri uyu munsi, kuko naje gutangirana namwe umunsi kandi nkaba naje kubavomerera mu buryo bukomeye; roho zanyu rero nizikomeze gusenderezwa ibyiza by’agatangaza, cyane cyane kuri uyu munsi udasanzwe naje kuvomereraho Ibiremwa byose kugira ngo roho zanyu zikomeze kuzurizwa kandi zikomeze gusabagizwa n’urukundo rwacu rukomeye.
MBIFURIJE UMUNSI MWIZA KANDI GUKOMERA KURI BURI WESE, KANDI GUKATAZA MURI BURI KIMWE CYOSE TURI KUMWE NDABAKUNDA NDI MALAYIKA RAFAYELI UBAKUNDA CYANE; UMUNSI MWIZA KANDI IGITONDO GIHIRE TURI KUMWE MU KUBAKOMEZA KANDI MU KUBASHYIGIKIRA MU BIKORWA BY’URUGAMBA CYANE CYANE KURI UYU MUNSI, AMAHORO AMAHORO.