UBUTUMWA BWA MUTAGATIFU MARIYA MADALENA, TARIKI YA 14 GASHYANTARE 2025
Amahoro y’Imana nasenderere kandi nasakare muri mwe, Biremwa bya DATA kandi Ntore z’Umusumbabyose, ndabakomeje kandi ndabataramishije igihe nk’iki ngiki ndi Mutagatifu Mariya Madalena, mbifurije kugubwa neza mu rukundo rwanjye n’urwa DATA kandi nkomeje kubambika imbaraga z’urukundo rwanjye kugira ngo zihore iteka zigaragariza muri mwe; ndabashyigikiye rero Ntore z’Imana dukunda kandi mbambitse imbaraga n’ububasha byanjye kugira ngo bihore byigaragariza mu buzima bwanyu bwa buri munsi; erega turi kumwe mu njyana y’urugamba kandi turi kumwe mu bikorwa bidasanzwe cyane cyane kuri uyu munsi w’Urukundo rw’Uhoraho Imana mu Isi ndetse no mu Kiremwa Muntu, kuko akomeje kurugaragariza abamwemera ndetse n’abatamwemera kandi abamwizera ndetse n’abatamwizera bari hirya no hino mu Isi kuko Urukundo rwa Kristu Nyagasani rwaje kwigaragariza buri wese nta n’umwe usizwe inyuma.
Ngaho rero nimurwakire cyane cyane muri ibi bihe kandi kuri uyu munsi udasanzwe kuko twaje kuruvugurura muri Mwene Muntu, ariko kandi abenshi barwitiranya kandi abenshi barutwara uko rutari, bakagenda uko bishakiye kandi bakagenda uko babyumva, ariko kandi ntabwo rwagakwiye gufatwa nkibisanzwe ahubwo rwagakwiye gusigasirwa muri Mwene Muntu, bityo rugahabwa ireme n’agaciro mu mitima ya benshi, ariko benshi bararuvuyanga kandi bakarufata uko bidakwiriye ariko igihe nk’iki ngiki dukomeje gushishikaza kandi dukomeje gukangurira Mwene Muntu kugira ngo ahagarare yemye bityo ahamye iby’ukuri kandi ahamye iby’Ingoma ya DATA uko bikwiriye, kuko twaje nk’abigisha mu Isi kandi tukaba twaraje gutangaza ikiri ukuri kuri Mwene Muntu kuko hari byinshi twaje kuvugurura kandi hakaba hari byinshi twaje guhigika, cyane cyane ibikomoka ku mwanzi byose tukaba twaraje guhirika kandi tukaba twaraje kubiribatisha ububasha bwacu, kugira ngo igikomeye kandi ikiri mu gushaka kwa DATA kirusheho gushyigikirwa kandi kirusheho gusigasirwa muri Mwene Muntu.
Harahirwa rero abumva icyo twifuza kandi harahirwa abumva icyo Uhoraho Imana abifuzaho uko bwije n’uko bukeye bityo bagaharanira kukigenderamo kandi bagaharanira kugikora batazuyaza, bityo bagashishikarira icyo bahamagarirwa, abo bose barahirwa kuko bateganyirizwa byinshi mu Ijuru kandi abo hakaba hari ingororano zidasanzwe bakomeje kuzigamirwa mu Bwami bw’Ijuru; namwe rero murabe maso kandi murusheho kwitegura, murusheho gusenga kugira ngo buri kimwe cyose twabazaniye kandi twabateguriye kirusheho kubashyikirizwa nta na kimwe gipfuye ubusa, kuko ibyo tubategurira kandi ibyo tubateganyiriza ari ibyiza gusa kandi akaba ari iby’ingirakamaro, cyane cyane rero Mwene Muntu wakunzwe kandi watoneshejwe n’urukundo rw’Uhoraho Imana akemera kwiguranwa kandi akemera gutangirwa igitambo gikomeye ari cyo Kristu Nyagasani, kugira ngo koko acungure abanyabyaha aho bava bakagera; nanjye rero ni muri urwo rwego nagiriwemo ubuntu kandi ni muri uwo mugambi wa DATA nafashirijwemo bityo mbasha kuzahurwa kandi mbasha kurohorwa, n’ubwo nari umunyabyaha ukomeye ariko kandi impuhwe za Nyagasani zaransanze ziransayura kandi zirandohora, bityo angirira ubuntu bukomeye mu buryo bw’agatangaza, ari nacyo gituma nanjye nkomeza kwitanga kandi nkaza kwitangira abatuye iyi Si kugira ngo ndohore kandi nkomeze kuringaniza amayira ya Mwene Muntu.
Erega bana banjye kandi Biremwa by’Uhoraho Imana, inzira munyuramo iragoye kandi iraruhije, ariko kandi nimuhumure kuko mufite abavugizi mu Ijuru kandi tukaba duhari kugira ngo dukomeze kubarwanirira ubutitsa dutsinda ikibi muri mwe kandi dutsinda ikibi muri Mwene Muntu, bityo imitego ya Nyakibi yose Mwene Muntu akunda guhuriramo nayo uko bwije n’uko bukeye, tukaba dukomeje kuyicyahisha ububasha bwacu kandi tukaba dukomeje kuyicogoza dukoresheje imbaraga zacu mu buryo butangaje, kuko dukomeje gufasha benshi mu rugendo rwabo kandi tukaba dukomeje kugaragara mu mbaraga ndetse n’ububasha ari nako dukomeza guhagararira Mwene Muntu mu Isi kugira ngo dukomeze kumucungura ku ngoyi y’ikibi umwanzi yagiye amushyiramo; ndabakunda cyane rero Ntore z’Imana kandi nkomeje kubashyigikira mu rukundo rwanjye na DATA, ngaho nimugume mu muzabibu we uko bwije n’uko bukeye, mutate kandi murusheho gutohagirira mu rukundo rwe kuko yururukije ububasha bukomeye kugira ngo akomeze abamwizera kandi abamwiringira, ari nako akomeza gutamiriza ubutoneshwe abamumenye kandi abamuzirikana by’ukuri, bityo bakamugaragariza urukundo rwabo nta buryarya.
Murahirwa mwebwe mwese mukomeje kwitanga nta kibagamburuza kandi nta kibakoma imbere kandi murahirwa mwebwe mwese mukomeje kwitanga mutitangiriye itama, kuko ibyiza byose mugenera abandi mu kwitanga ndetse no kwitamba muzabikubirwa karijana, kuko uwakoze neza azabihemberwa kandi uwakoze nabi nawe akazabihanirwa, ngaho rero nimuharanire igishimisha Uhoraho Imana mu buzima bwanyu bwa buri munsi, bityo mube inkingi koko yubakiweho inkuta z’iby’Ijuru kandi mube inkingi zifashe benshi mu Isi kandi zifashe byinshi mu Isi kuko koko muri irorero kandi mukaba intangarugero muri bose, ngaho rero urwo rukundo kandi icyo cyizere Uhoraho Imana yabagiriye nimukomeze kukigaragaza kandi nimukomeze kugisakaza hirya no hino ku Isi, murushaho gukora ikijyanye n’ugushaka kwa DATA kandi murushaho kugendera mu nzira nziza y’icyo abifuzaho ibihe byose.
Ndabakunda rero kandi ndabashyigikiye kuri uyu munsi udasanzwe nabazaniye urukundo rukomeye kugira ngo rusenderere kandi rusakare mu mitima yanyu, bityo murusheho kubakika kandi murusheho gukomera mu rugendo mwatangiye, kuko naje kubakomeza kandi naba naje kubahumuriza, bana banjye kandi Ntore z’Imana dutaramanye, mbambitse imbaraga kandi mbambitse imbaraga z’urukundo rwanjye kugira ngo zihore zigaragariza muri mwe, mu kurushaho kubashishirikaza gukora icyiza kandi mu kurushaho kwitanga nta kibaziga mu buzima bwanyu bwa buri munsi, murushaho kwegukira Ingoma ya DATA kandi murushaho kuyinderamo, nta kibagamburuje na kimwe mu rugendo.
Nimugire amahoro mbambitse imbaraga, mbahaye gukomera kuri buri wese ndi Mariya Madalena ubakunda cyane, mbahobereye mwese mu rukundo rwanjye n’urwa DATA ngira nti “Indamukanyo yanjye ni ‘Kristu Nyagasani koko nakomeze kubabera inshuti nyanshuti mwirinde kumubangikanya n’iby’Isi kandi mwirinde kumubangikanya n’ab’Isi, bityo murusheho kumwiyegurira nk’uko nanjye namwiyeguriye, bityo akantwara umutima wese kandi nkarushaho kumwirundurira mu minsi y’ubuzima bwanjye, bityo nkatwarwa nawe kandi nkamwirunduriramo wese’; ngaho rero namwe icyo cyiza nagiriwe kandi iyo neza nagiriwe namwe nkomeje kuyibasabira kandi nkomeje kuyibasakazaho cyane cyane muri ibi bihe benshi bakomeje kubura icyerekezo cy’ubuzima bwabo, ariko kandi njye ndahari kugira ngo mbahe amaherezo meza kandi mbahe icyerekezo cy’urukundo ruhoraho muri Uhoraho Imana”; ngaho rero nimukomere kandi murusheho gukataza, kuko naje kubashyigikira kandi nkaba naje kubavugururamo imbaraga zikomeye kugira ngo koko murusheho gushyigikirwa n’ububasha bwacu nk’ab’Ijuru.
AMAHORO AMAHORO, MBIFURIJE UMUGOROBA MWIZA KURI BURI WESE NAKOMERE KANDI ARUSHEHO GUKATAZA, NANJYE TURI KUMWE NDABAKUNDA, NDI MARIYA MADALENA UBAKUNDA CYANE, AMAHORO AMAHORO.