UBUTUMWA BWA MUTAGATIFU YOZEFU, TARIKI YA 12 GASHYANTARE 2025
Mbifurije igitondo cyiza Ntore z’Imana dukunda, ndabakomeje kandi ndabashyigikiye mu bikorwa by’urugamba, nimukomere kuko mbakomeje kandi nkaba mbashyigikiye muri byose kandi nkaba mbambitse imbaraga z’urukundo rwanjye kugira ngo zihore iteka zigaragariza mu buzima bwanyu bwa buri munsi, turi kumwe rero mu njyana y’urugamba kuri uyu munsi kandi ndabashyigikiye ndabakomeje bana banjye kandi Ntore z’Umusumbabyose; mbifurije kugubwa neza mu rukundo rwanjye n’urwa DATA, amahoro yanjye y’igisagirane nasakare kandi nasendere mu mitima yanyu, bityo iteka ryose muhore mugurumana ikibatsi cy’urukundo mu mitima yanyu mufitiye Uhoraho Imana; ubuzima bwanyu rero niburusheho kubaka muri Uhoraho Imana kandi niburusheho kumvikaniramo impumeko y’icyiza mukora ikijyanye n’ugushaka kwa DATA kandi murushaho kwitanga no kwitambira bose kuko muri mu rukundo rwa DATA, bityo rero akaba ari nta na kimwe kigomba kubagamburuza ku mugambi Uhoraho Imana abafiteho kandi namwe mwemeye kumusanga mwese mugahara byose kandi mugahara ibyanyu ndetse n’iby’Isi, ni yo mpamvu mugomba gushikama nta kibavuguruje kandi nta kibakomye imbere; nimukomere rero nanjye ndabakomeje kandi ndabashyigikiye mu bikorwa byanyu bya buri munsi, kuko mbambika imbaraga ibihe ndetse n’ibihe kandi nkaza kubavugururamo imbaraga zikomeye, kugira ngo mukomeze gutera imbere mu kwemera ndetse no mu kwizera.
Ngaho rero nimukomeze urugendo kuko turi kumwe mu kubashyigikira kandi mu kubakomeresha umugisha wanjye wa kibyeyi kugira ngo uhore ubafungurirwa kandi uhore ubashyigikiye, uhore ubakomeza mu ntambwe yanyu ya buri munsi ubudatezuka; mporana namwe iteka ryose kandi nkagendana namwe mu bikorwa by’urugamba bya buri munsi dutsinda kandi dutsiratsizanya ububasha bw’umwanzi bukomeye aho buva bukagera, kuko ikibi cye cyose kandi amayeri ye yose aho ava akagera dukomeje kuyatarura kandi dukomeje kuyashyira ku mugaragaro kugira ngo ikibi yashyize muri Mwene Muntu kirusheho kugaragazwa kandi kirusheho guteshwa agaciro, ari nako gikomeza kwamburwa ijambo kuko muri iki gihe nta bubasha afite ku Kiremwa Muntu kandi akaba ari nta n’uburenganzira afite mu kwigarurira Mwene Muntu aho ava akagera.
Ni yo mpamvu rero dukomeje gutatanya ibitekerezo bye kandi dukomeje gutatanya ibyifuzo bye bibi afite kuri Mwene Muntu, kugira ngo arusheho gushyigikirwa kandi harusheho kwimakazwa urukundo rw’Uhoraho Imana mu Isi ndetse no mu Kiremwa Muntu, kuko dukomeje guhuriza hamwe imbaraga zacu kugira ngo twubake kandi dusenye ikibi cyose muri Mwene Muntu, bityo hashyigikirwe ibikorwa byacu nk’ab’Ijuru kandi himakazwe urukundo rw’Uhoraho Imana muri Mwene Muntu; ni yo mpamvu rero dukomeje gukomanga mu mitima ya benshi kandi tukaba dukomeje gukomangira buri wese, kugira ngo arusheho gufunguka kandi arusheho gufungura, kugira ngo twinjiremo wese kandi tuganze duture mu mitima yanyu kandi duture mu mitima y’abatuye iyi Si, bityo tubayobore kandi tubatoze igikwiriye kandi igitunganye, kuko tutifuza ko abacu bagenda nk’abanyabwoba ahubwo twifuza ko mwahagararana ishema n’ubukaka aho muri hose bityo mugahamya kandi mugashishikaza aho muri hose mutoza benshi iby’Urukundo rwa DATA kandi murushyigikira muri benshi cyane cyane abo bose umwanzi yakomeje gukayura kandi abo bose umwanzi akomeje kwigarurira akoresheje uburyarya bwe bubi, tukaba tuje kubaramiza ineza n’amahoro bidukomokamo, kuko Ijuru ryose twemeye kuza kwifatikanya namwe mu bikorwa byo kurohora Isi ndetse n’abayituye.
Ngaho rero nimwakire intwaro z’urumuri kugira ngo murwane kandi muhashye umwanzi mwivuye inyuma kuko muri mu mbaraga zacu kandi mukaba muri mu bubasha bwacu mu buryo budasubirwaho, nimwakire gutsinda kandi nimwakire umutsindo wanjye n’uwa DATA kugira ngo uhore wigaragariza muri mwe nanjye ndahari ndaganje kugira ngo nkomeze kubatera ubutwari, imbaraga ndetse no gukomera, bityo muhore mujya mbere mu kwemera ndetse no mu kwizera mukomeza kugaragaza ibikorwa byacu muri mwe, kuko muri rwagati muri byo kandi tukaba tubibatujemo mu buryo budasubirwaho; ngaho rero nimukomere kandi mukataze turi kumwe ndabakunda, ndabashyigikiye mu kubambika imbaraga kandi mu kubasesekazaho ububasha bwacu bukomeye kugira ngo mushikame kandi murusheho kujya mbere mu murimo mwatorewemo n’Uhoraho Imana.
AMAHORO, IBIHE BYIZA TURI KUMWE NDABAKUNDA NDI MUTAGATIFU YOZEFU, AMAHORO AMAHORO.