UBUTUMWA BWA MALAYIKA RAFAYELI, TARIKI YA 30 KANAMA 2024
Mbifurije umunsi mwiza Ntore za DATA dutaramanye, mbifurije gukomera ndetse no gukataza mu rukundo rw’Uhoraho Imana, turi kumwe ndabakunda kandi ndabashyigikiye, kandi ndabazirikana mu buzima bwanyu bwa buri munsi, kuko mbumbatiye buri wese mu rukundo rwanjye n’urwa DATA kandi nkaba mbakomereje intambwe muri byose, ngaho nimukomeze kujya mbere mu rukundo rw’Uhoraho Imana nanjye turi kumwe ndabashyigikiye mu bikorwa bidasanzwe by’Uhoraho Imana, kuko nshyigikiye buri wese mu bikorwa bye bya buri munsi bityo nkaba nkomeje kubayoboresha ububasha bwanjye budatsindwa, bityo ku rugamba rwanyu nkaba mpari nk’umurwanyi nkaba nkomeje kurwanirira intambwe yanyu ya buri munsi, kugira ngo koko iteka ryose muhore mukeye kandi muhore mugera ku mutsindo ukomeye wa DATA; nifatikanyije namwe muri byose, nimukomere ku rugamba turi kumwe kandi nimukomeze injyana y’icyiza mu buzima bwanyu kuko mbashyigikiye kandi nkaba nkomeje kubakomeza, nkaba nkomeje kubateza intambwe uko bwije n’uko bukeye.
Ngaho rero nimukomeze kujya mbere mu Kwemera ndetse no mu Kwizera, iteka ryose muhore muhihibikanira ikiri icyiza kandi muhore muhihibikanira Ingoma ya DATA, kuko dukomeje gutegereza benshi cyane cyane abo bose biteguye guhinduka ndetse no guhindukirira urukundo rukomeye rwa DATA, bityo natwe tukaba dukomeje kubasanganiza umwete ndetse n’ubwira mu buryo bukomeye, dukomeza kubakomereza intambwe kandi dukomeza kubashyigikira muri byose; dukomeje rero kubambika imbaraga kandi dukomeje kubafungura maso bundi bushya, kugira ngo murebe buri kimwe cyose kandi mubashe kureba iby’ejo ahazaza kuko benshi umwanzi akomeje kubibetana mu buryo bukomeye ariko twe iteka ryose tukaza kubahumura amaso kugira ngo mubashe kureba buri kimwe cyose kandi mubashe kwitegereza, bityo mukenge ikibi cy’umwanzi bityo mugihungire kure, ngaho rero nimwambare intwaro z’urumuri bityo iteka ryose muhore mukereye gutsinda ikibi kandi muhore mukereye kugihashya mu Isi ndetse no mu Kiremwa Muntu, kuko natwe twaje kurwanana namwe urugamba kandi tukaba twaraje kubatoza iby’urugamba.
Iteka ryose rero nimuhore muri maso kandi muhore mukereye kwakira imbaraga z’ububasha tubagabira uko bwije n’uko bukeye, kugira ngo zikomeze kubafasha kurwanya ikibi ndetse no kugitsemba mu Isi burundu, natwe turi kumwe kuko twaje nk’abarwanyi kugira ngo dukomeze kwifatikanya mu bikorwa buri munsi, kandi tukaba twaraje kugendana kugira ngo dukomeze kurwanya umwanzi twivuye inyuma; erega turaganje mu bikorwa byanyu bya buri munsi kandi dukomeje kwigaragariza hirya no hino mu bubasha bwacu budatsindwa kandi mu mbaraga zacu zitavogerwa, tukaba dukomeje kuvogagira imbaraga z’umwanzi aho ziva zikagera, namwe rero nimukataze kandi murusheho gukomera, murusheho gukomeza urugendo kuri buri wese, nta n’umwe ugamburujwe kandi nta n’umwe ucitse intege, kuko nanjye mbakomeje kandi nkaba mbashyigikiye mu rukundo rwanjye n’urwa DATA.
Mbambitse imbaraga zanjye kandi mbasendereje ububasha bwanjye aho muri hirya no hino ku Isi, kuko mbashyigikiye kandi nkaba nkomeje kuramburira ikiganza cyanjye ku babi n’abeza, ngaba ubuzima kandi ngaba umugisha wanjye wa kibyeyi kugira ngo ukomeze ab’amavi adandabirana, bityo bakomeze kuruhukira mu biganza bya DATA mu buryo budasubirwaho; nifatikanyije namwe rero kuri uyu munsi kandi turi kumwe mu bikorwa by’urugamba kuko dukomeje kugaragariza Isi yose umutsindo ukomeye wa DATA kandi tukaba dukomeje kubimenyekanisha mu babizi ndetse n’abatabizi, kuko twaje gushyira byinshi ku mugaragaro kandi tukaba twaraje gushyira buri kimwe cyose mu mwanya wacyo.
Ni igihe rero cyo gutwikurura kugira ngo ibihishwe bikomeze kujya ahabona kandi bikomeze kujya ku mugaragaro kuko nta na kimwe twifuza ko cyasigara kibangamiye urukundo rwa DATA, akaba ari yo mpamvu dukomeje guhangamura buri kimwe cyose mu mbaraga zacu zidatsindwa, kandi akaba ari yo mpamvu dukomeje gushyirana byinshi kandi byose ku murongo; nimukomeze rero gufatana urunana kandi mukomeze gutera imbere mu bikorwa byanyu turi kumwe, ndabashyigikiye kandi ndabakomeje mu rukundo rwanjye rutavogerwa, ndi Malayika Rafayeli; nimugire ibihe byiza Ntore za DATA turi kumwe ndabarinze kandi ndabashyigikiye, mbakomereje intambwe muri byose, nimukomeze gutera intambwe mujya mbere kandi nimukomeze kwizihirirwa mu bikorwa by’Uhoraho Imana, nanjye turi kumwe ndabakomeje ndabashyigikiye kandi mbahaye umugisha wanjye wa kibyeyi kugira ngo ubakomeze kandi ubashyigikire muri byose.
AMAHORO AMAHORO MBIFURIJE IGICAMUNSI GIHIRE KURI BURI WESE, NGIRA NTI “UMUNSI MWIZA KANDI GUKOMERA NDETSE NO GUKATAZA TURI KUMWE NDABAKUNDA, AMAHORO AMAHORO”.