UBUTUMWA BWA ROHO W’IMANA BWO KU WA 23 GASHYANTARE 2026
Mbasakajeho imbaraga zikomeye n’ububasha butavuguruzwa mbifuriza amahoro y’Uhoraho Imana Umubyeyi Umuremyi wa byose, ngira nti: “Kristu naganze mu mitima yanyu, urukundo rwe rukomeze rwururukire muri mwe, ububasha bwanjye bubigarurire”, kuko mbasanganije urukundo n’urugwiro kandi nkaba nje mu buzima bwanyu, kugira ngo mbakomereshe Umwuka wanjye Muziranenge kandi mbambike imbaraga z’Ikibatsi Gitagatifu, kugira ngo zibakomeze kandi zibakomeze mu rugendo rwanyu rwa buri munsi. Ndi Roho-Muyobozi mu buzima bwanyu kuko mbayoboye mu buryo bwose kandi nkaba mbakomeresheje imbaraga zidasanzwe kugira ngo mbereke kandi nkomeze mbagaragarize ibikorwa by’ubutwari, bityo mukaba mukomeje guhirwa kuko nkomeje kubana namwe kandi nkomeje kuberekeza mu nzira y’ubutungane; ububasha bwanjye ntibukumirwa kandi abo nyoboye ntibayoba kuko urumuri rwanjye rubamurikira, Ijambo ryanjye rikabakomeza kandi rikabaha kugubwa neza, kuko mvuga kandi nkora kandi imirimo yanjye ikigaragariza abato n’abakuru, ububasha bwanjye bugakwirakwira hirya no hino kugera ku mpera z’Isi. Nimwakire rero urumuri rutavuguruzwa kugira ngo mukureho kandi muhigike ibikorwa byose by’umwanzi akenshi na kenshi bisatiriye Isi, kuko ndi mu rugamba rwa nyuma kandi nkaba nifatikanyije namwe mu kububakamo imbaraga zikomeye ndetse no gusakaza ububasha hirya no hino ku Isi; erega muri mu bubasha bwacu kuburyo bwuzuye kandi imbaraga zanjye ntizikumirwa, kuko imirimo yanjye nyikorera hose kandi nkagerera hose icya rimwe, iyo nururutse ibikorwa byanjye birigaragaza kandi aho ntashye umwijima urahunga urumuri rugatangaza, kuko urumuri rwanjye ntiruzimata ahubwo ruhora rwakirana umunsi ku munsi; ngaho rero Ntore Ntumwa za DATA, Biremwa by’Umusumbabyose twifatikanyije kuri uyu munsi mu isengesho ryanyu rya buri kanya kandi rya buri segonda, uko mutura kandi uko mwiha Uhoraho Imana Umuremyi wa byose, niko mbareberera kandi niko mbuzura kugira ngo mudacika intege cyangwa mukaba mwarambirwa mu rugendo.
Nimuntabaze mu bihe byose kuko ndabatabara kandi mbateze amatwi kuko ari ryo sezerano ryanjye, bityo umuteguro w’ibikorwa byanjye ukaba ukomeje kwigaragariza muri mwe, mwarahiriwe kuko ndi rwagati yanyu kandi nkaba mbujuje ububasha bukomeye kuko mutamfite ntaho mwagera, ntacyo mwakora nta n’icyo mwageraho, kuko iteka ryose abo nyoboye bagaragarizwamo imirimo n’ibitangaza kandi bagahora bishimye banezerewe kuko mba mbambitse urukundo ruhoraho. Ndi urukundo rusa rusa kandi abo nshishikaje barashishikara kandi bakamenya icy’ingenzi, icya ngombwa ndetse n’ikibafasha mu nzira zabo; ngaho rero nimukomeze mube ku gicaniro kandi mukomeze mwakirane mu buryo bwose kandi mu buryo budasubirwaho, kuko icyo ndi gukora kandi icyo ndi kubagaragariza ni icy’ubutwari gikomeye cyane. Nimwizihirwe muberwe rero no kwakira imbaraga nshya kandi mukomezwe mu murimo wa DATA kuko mwahawe kandi mwasobanukiwe ibibafasha ndetse n’ibibakomeza mu nzira y’ubutungane, turi gutunganya byose kugira ngo Kiremwa Muntu ho kiva kikagera amenye aho ashinga ikirenge ndetse n’aho yerekera, bityo rero tukaba dukomeje kwagura imbago zanyu kugira ngo mwisanzurire mu rumuri rw’Imana ubuziraherezo.
Nshuti Nkoramutima z’Umusumbabyose dukunda, twururutse mu bubasha bwacu nk’Ubutatu Butagatifu kuko icyo dukora tukizi kandi icyo tubateganyiriza akaba ari icy’ingenzi, ububasha bwose twabwururukije kugira ngo bubatwikire kandi bubasigasire, bityo burwanye ikibi muri mwe kandi murwanye ikibi mu bantu kuko mwashyizwe ahirengeye kugira ngo muhagararire imbaga itabarika. Iyaba Isi yose yari izi umumaro wanyu kandi ikamenya ubwitange bwanyu, buri wese yaca bugufi kandi akamenya Imana kurushaho, ariko benshi bariraye bakora ibyo bishakiye, bateshuka ku cy’ingenzi bityo barirarika, niyo mpamvu ibyago n’amakuba bikomeje kugwirira Isi yose. Mwebwe rero Ntore z’Imana kandi Ntore za DATA, nimwambare umwambaro tubambika umunsi ku munsi, mutege amatwi Ijambo ryanjye n’iry’Umusumbabyose, kuko tudatandukana kandi akaba yaranyohereje mu Isi kugira ngo mbuzuze imbaraga zanjye kandi nkomeze mvugurure ingabire n’ingabirano zanyu, zibasenderere kandi zibahe kumenya icy’ingenzi; nje kubambika ububasha bukomeye kugira ngo mwakire imbaraga nshya, bityo mubeho mu rumuri rutavogerwa kuko ari igihe cyo kubasusurutsa; aho ngeze ibikorwa byanjye birigaragaza, akaba ari nayo mpamvu mbayoboye ku rugamba, nta gishobora rero kubahangara kuko ndi umurwanyi kandi nkaba umurashi udahusha, iteka ryose urugamba ndwanye ndarutsinda kandi nkatsindira bose mu buryo bwuzuye kandi mu buryo budasubirwaho.
Nimwakire imbaraga zibakomeza kandi zibaherekeza mu nzira igana Imana, bityo Ikibatsi cy’Urukundo gikomeze kigurumane mu mitima yanyu, mwarahiriwe nimukomeze muhirwe kuko umfite aba afite byose kandi Ijuru ryose tukaza tugatura iwanyu; nimudukingurire imitima yanyu kuko ari ryo cumbi ryacu, kandi iteka ryose mwizihirwe muberwe no kwakira imbaraga nshya. Urumuri rw’Imana nirubasakareho, ububasha bw’Ijuru bwururukire mu mitima yanyu, bityo iteka ryose munezezwe n’uko ububasha bw’Ijuru bwururutse ndetse n’imbaraga za DATA zikaba zibatuyemo; erega ndi kumwe namwe mu mbaraga zikomeye no mu bubasha buhanitse, kugira ngo nkomeze mbagaragarize kandi mbafungurire ibikorwa bishya, kuko ari igihe cyo kubanezeza kandi akaba ari igihe cyo kubakomeza muri ibi bihe murimo; muri mu bihe byo kugendana n’Ijuru mu buryo bwuzuye kandi mu buryo bufatika, mwicuza mwihana kandi mwisubiraho. Niyo mpamvu ari ngombwa ko munyakira mu buzima bwanyu kugira ngo mbafungurire byose, mbereke ibitunganye ndetse n’ibidatunganye, mumenye icyo mugomba gushyira imbere ndetse n’icyo mugomba kwigizayo.
Aho ntashye umwijima urahunga kuko ndi urumuri, urumuri rwanjye rero ntiruturana n’umwijima kuko Muntu unyakiriye muri we ahabwa byose kandi agahabwa umunezero mu buryo bwuzuye; nimwakire rero imbaraga zibinjiza mu rukundo rwa DATA, kuko nkomeje kubazamura kandi nkaba nkomeje kubereka icyerekezo kidasanzwe, nimwambare umwambaro mutagatifu kugira ngo uwo mwambaro ukomeze ubatunganire kandimukomeze namwe muwutunganiremo, bityo Ikibatsi mwambitswe gikomeze cyere kandi gikomeze kibahe kwambara ikirezi gitunaniye buri wese. Nimwakire rero umugisha w’Uhoraho Imana Umuremyi wa byose, kugira ngo wigarurire imitima yanyu kandi amaso yanyu arusheho kubona icy’ingenzi, icya ngombwa ndetse n’igifatika mu buzima bwanyu bwa buri munsi. Ndi kumwe namwe rero mu mbaraga z’Ubutatu Butagatifu, kugira ngo iteka ryose mwumve ko mu rugendo murimo mutarurimo mwenyine, ahubwo mwifatikanyije n’ingabo zose, abamalayika ndetse n’abatagatifu bakaba babashyigikiye mu bikorwa byanyu bya buri munsi. Iyo turi kumwe turishima kandi namwe mukanezerwa, kuko koko ibikorwa byanyu biba bifite aho biri kwerekeza; nimukomeze rero mube ku izamu ryanyu mu buryo bwuzuye kandi mwishimire ko Uhoraho Imana yabahaye atitangiriye itama.
MBIFURIJE UMUNSI MWIZA BIREMWA BYA DATA DUKUNDA, TURI KUMWE MU BURYO BWOSE KANDI TURI KUMWE MU BICE BYOSE BITANDUKANYE, KUKO HIRYA NO HINO TUHAGERERA ICYA RIMWE KANDI TUGAKORANA NAMWE IBY’UBUTWARI; MBIFURIJE UMUNSI MWIZA, NIMUKOMERE KANDI MUKOMEZE URUGENDO, NDI ROHO W’IMANA MU BUZIMA BWANYU BWA BURI MUNSI, AMAHORO AMAHORO!