UBUTUMWA BWA YEZU KRISTU, TARIKI YA 25 MATA 2023.
Mbifurije ibihe byiza ntore zanjye, kandi ntore za Data, dutaramanye kandi ndamburiye ihema ryanjye, kugira ngo mbugamishe kandi mbakingire icyitwa ikibi icyo ari cyo cyose, kuko nururutse mu bubasha bwanjye, kandi mu mbaraga zanjye, kugira ngo mbazigame kandi mbazigamire ikiri icyiza.
Njye na Data tukaba tubururukirijeho imbaraga zibakomeza, kandi ububasha bushyigikira buri wese mu kurushaho gutera intambwe, agana inzira y’ugushaka kwacu.
Biremwa nacunguye, kandi ntore za Data, nshyigikiye kandi mbereye Umwami n’Umukiza, mbifurije gukomeza no gukataza mu nzira y’ubutungane, kuko nabatoye mbazi kandi nkaba mbashyigikishije ububasha bwanjye n’ubwa Data, kugira ngo murusheho gutera imbere mu rumuri rw’Imana, kandi mu rukundo rwanjye n’urwa Data.
Mwashyiriweho kwandikisha amateka meza mu Isi, ndetse kubaka ibikorwa bishya mu Isi, mu buryo budasanzwe, mubinyujije mu bwitange bw’isengesho ryanyu ritaretsa ; kugira ngo imbaraga tubagabira, kandi ibyiza byose tubagabira umunsi ku wundi, ngo bibafashe gutsinda imbaraga zose z’umwanzi zugarije ikiremwa muntu.
Mukomere rero kandi mukomeze gukataza mu kiri icyiza, kuko twabatoye tubazi kandi twabazigamye tubazi, kugira ngo ijambo ryanjye n’irya Data muryamamaze, kandi ryogere hose mu Isi.
Ndabashyigikiye mu mbaraga kandi mu mwete mbatera, mu ishyaka mpora mbasukira, kandi mu kinyotera cy’urukundo mpora mbuganiza mu mitima yanyu, kugira ngo mwumve ijambo ryanjye, ribabibwemo umunsi ku munsi rifate ireme ; bityo mube abaryamamaza kandi mube koko ababereyeho kugira ngo ibikorwa byanjye n’ibya Data, byubake amateka mashya mu kiremwa muntu.
Mbifurije kuganza mu rukundo rwanjye ubutaretsa kandi ubutadohoka, kuko ari wo mutsindo wa buri wese, kuko ibyo mwakora byose mutabikoreye mu rukundo, nta kamaro byagira.
Nimugire ubuzima kandi mukomezwe, mutezwe imbere mu rumuri rwanjye n’urwa Data, kuko ariho mbazigamiye ibiri ibyiza bikomeye, kandi by’ingenzi n’ingirakamaro, ku buryo Isi idashobora kubibanyaga.
Ndi muri mwe rero ntuganya byose muri benshi, kugira ngo mbazigamire ubuzima bushya, kandi mbubakire amateka mashya, mu kubaha imbaraga no kubasendereza imbaraga zibafasha gutsinda ikiri ikibi, bityo mukarushaho kwiyunga na Data mu buryo bukomeye.
Ni igihe rero cyo gukomera kandi ni igihe cyo gukomeza kwitegura ku bemera, kugira ngo mumurikire abatemera, bityo muzahure roho zabo mu bikorwa byanyu, kuko ari igihe mushiskamiwe n’ibibi byose by’umwanzi, kandi ari igihe muri ku rugamba, kandi buri wese wemera kugendera mu rumuri rwanjye no mu gushaka kwanjye, akaba ari igihe cyo kwitegura, kandi kwitoza kugira ngo mubeho mu butungane, kandi mubeho mu gitunganiye Data, muharanira guhesha ikuzo Data, ariko mwitandukanya n’ikibi n’igisa nacyo.
Iyi Si rero ikaba yugarijwe na byinshi bibi, kandi ikaba yugarijwe n’umwijima, akaba ari igihe rero njye na Data turi kugenda twongera urumuri mu Isi, kugira ngo umwijima ukurweho, hagaragare urumuri.
Ni igihe turi gutamurura ikitwa umwijima, cyane cyane mu mitima y’abantu, kugira ngo bakire urumuri rwacu kandi rubabemo, rubaturemo, rukamuremo ikibi cyise cy’umwanzi wabagize imbata.
Mwebwe rero mukaba muri rwagati mu Isi nk’amatara yaka, kugira ngo babarebereho mu bikorwa byanyu biranganwa ukuri n’ubutungane, kugira ngo mube urumuri rwa benshi, kandi mumurikire benshi, maze icyiza kibarimo mukigaragarize ababari impande, bagoswe n’umwijima.
Ni igihe rero abana b’urumuri bashyamiranye n’ab’umwijima, ariko kandi muzirikane ko natsinze, kugira ngo muharanire ikuzo ryanjye n’irya Data, kuko abana b’umwijima badashobora kubarwanya ngo babatsinde.
Nimukomere rero kandi mushyigikiwe n’ububasha bwanjye, kuko nta cyabananira turi kumwe, akaba rero ari igihe kirushijeho gukataza, kugira ngo abacu tubegukane, kandi tubakure mu nzara z’umwanzi, kandi tugaragarize Sekibi ugutsindwa kwe n’ingabo ze.
Naratsinze kandi nsindira bose, bityo umutsindo wanjye ukaba ugaragarira mu bankurikiye, kandi nkaba nywugaragariza ku banyemera n’abanyizera, kuko batazakorwa n’isoni n’ikimwaro.
Nimukomere rero kandi mukataze, kuko mbabereye byose, kandi nkaba mbabareye umutsindo muri byose, kuko unyemera wese kandi uwemera mu gushaka kwanjye n’ukwa Data, azahabwa imbaraga mu buryo bukomeye kandi agakora ibitambutseho ibyo nakoze, ku bw’ububasaha bwanjye, kandi ku bw’isezerano, nagiranye namwe kiremwa muntu.
Ni igihe rero cyo gukomeza gukaranira ikuzo ryanjye n’irya Data, kuko twiyemeje kubuzuriza amasezerano, ndetse no kugaragaza ibikorwa byacu bitangaje, ariko namwe mufite aho muvuye n’aho mwerekeje.
Ni ngombwa kwiyambura buri kimwe cyose cyabatandukanya n’urukundo rwacu, ni ngombwa kwiyambura ubushwambagara mukambikwa umwambaro w’urumuri, kugira ngo uwo mwambaro w’ubukwe, ubashe kubatagatifuriza mu bikorwa byacu, ari nako tubasendereza imbaraga zacu, kuko nyine tudashaka gutanga ibyacu mu mwanda, ahubwo dushaka kubitangira ahasukuye.
Ngaho rero buri wese najye ku rugamba rwa roho, kandi arwanirire ukwemera kugira ngo mutsinde, maze muri urwo rugamba nanjye na Data dutebuke, dutabare kandi tubongerere ukwemera, ukwizera n’urukundo, maze ibyo byose bibashe gukurura imbaraga mu buryo budasanzwe, ari ho hazagaragaza intsinzi mu buryo bw’agatangaza mu Isi yose, umutsindo ugaragarira abana b’urumuri, mu gutsinda batsindishije izina ryanjye n’irya Data.
Ntimugakangarane rero kuko ari igihe cy’urugamba rwo kurwanirira ukwemera kuri buri wese, kuko nta wushobora kwambuka atarwanye urugamba, kandi nta n’ushobora kwambuka atarwanye urugamba, kandi nta n’ushobora kugaragarizwa ibitangaza byanjye n’ibya Data adafite icyo yarekuye.
Nimurekure rero iby’Isi kuko atari ibyanyu, kandi nimurekure Isi kuko mutari ab’Isi, bityo muharanire ingoma y’Ijuru, kuko mwayihaweho umugabane kandi iby’Ijuru mwabihaweho umugabane, kandi iby’Ijuru mwabihaweho umugabane, ari yo mpamvu mugomba gukataza mugana aheza, kandi mugana ibyiza by’ingoma y’Ijuru.
Nimugende mu by’Isi nk’abagenzi, kandi muyibemo nk’abatayirimo, mwitandukanya n’ikibi cyayo icyo ari cyo cyose, kuko njye na Data tuje guhinda no guhindura byinshi mu Isi, kugira ngo abacu tubagenere umugabane ukwiriye kandi utunganye, kuko tutazasubira inyuma tutarangije umugambi twagambiriye mu kiremwa muntu.
Hari icyo tugomba gukorera Isi njye na Data, ariko namwe hari icyo mugomba gukora, kugira ngo mungaragarize ukwemera kwanyu, ari yo nzira rero buri wese agomba gucamo y’ukwemera, akarwana urugamba rw’ukwemera, kugira ngo dutebuke dutabare, maze ducecekeshe ibihindisha umushyitsi abacu, kandi ducecekekeshe amajwi yose y’umwanzi, wahagurukiye abacu iki gihe.
Ni igihe rero gikomeye kandi ni igihe kije gikomeye, kugira ngo tugaragarize ububasha bwacu, mu buryo bw’agatangaza, kandi tuze gucubya amatiku mu bemera kandi mu bazi ibikorwa byanjye na Data, kuko nyine urugamba rw’umwanzi rugiye guhagurukirwa abacu mu buryo budasanzwe, bakarwanywa, bagatotezwa kandi bagateragiranwa, mu buryo bukomeye kuko nta ntumwa isumba uwayitumye.
Ni igihe rero cyo gukomera no gukomeza kwitegura, kugira ngo buri wese yumve aho ahagaze, kandi yumve uguhamya ukwemera kwe, aho ahagaze, kandi uko agomba guhagarara mu guhamya ukwemera kwe.
Uzemera kumpamiriza mu ruhame rwa benshi, kandi uzemera kwihara ahamya ibyanjye, abikuye ku mutima, kandi atanyutranyije n’ugushaka kwanjye n’ukwa Data, nanjye nzatebuka ntabare, maze mukure mu menyo y’abasetsi, bityo nkumire kandi nigizeyo ibimuhagurukiye byose, mwaramwaze imbaraga zose z’umwanzi, kuko ariyo ntego yanjye na Data, kandi ariwo mugambi wanjye na Data, tuje kugaragariza abatuye Isi.
Murakomere rero kandi mukomerejwe intambwe, kuko mbashyigikiye mu bubasha bwanjye n’ubwa Data, ngo mutere intambwe tugende, kuko mbakingirije kandi nkaba mbakomeresheje ububasha bwanjye.
Ndi uriho kandi nzahoraho mu biremwa, kuko niyemeje gutabara buri wese wemera izina ryanjye, bityo mu izina ryanjye nkazamuha gutsinda buri kimwe cyose.
Nimuzirikane rero ko umwanzi murwana nawe atari umuntu, bityo murwanye ibitero bibisha by’umwanzi, byigabije benshi bikabigarurira, bikabateza inabi, bityo benshi bakaba ibikoresho by’umwanzi ku bemera.
Ntore zanjye kandi ntumwa zanjye, ntimugakangwe n’abana b’Isi igihe bahagurutse kandi ntimugakangwe n’imitontomo y’intare kuko ntacyo ishobora kubatwara.
Ngaho rero nimukomere kandi mukataze, kuko ushyigikiwe n’Uhoraho kandi ushyigikiwe n’Ijuru ryose, nta wushobora kumubuza kuvoma.
Nimukomeze rero muvome, kandi muvomererwe, kuko ntatubya ibyo mbaha, ahubwo iteka ryose mpora mbyagura kugira ngo bibagirire akamaro kandi muhore iteka musonzeye ibyanjye, kuko iby’Ijuru mutagomba kubihaga, ahubwo iteka ryose mugomba guhora mufite inyota yabyo, kugira ngo iteka ryose mu kubisonzera, ariko murushaho gutera imbere mu kwitagatifuza, kuko tutabarambira kandi iby’Ijuru tubaha bigahora ari bishya kandi bitagomba kurambirana muri mwebwe.
Bana mwatowe kandi bana b’ingoma, nimukomere kuko igihe ari iki cyo gukenga kandi cyo kuba maso, mukamenya imitego y’umwanzi inyuzwa ahatazwi, kandi mukamenya imitego y’umwanzi uko iteye n’uko ihagaze, kuko nabahaye kubona, kureba ibyo abandi batareba, guhishura iby’abandi batarahishura, kugira ngo ububasha bwanjye n’ubwa Data buzasange buri wese amaze gukabura kandi amaze guhagarara mu mwanya ukwiriye ibihembo.
Sinifuza ko abo natoye kandi abo nagaragarije ibikorwa byanjye ndetse n’ibyiza byanjye, bahabwa ibihano, ahubwo iteka ryose nifuza ko mwakwakira ibihembo, kubera ibyiza mwaruhiye, kandi kubera mwarwanye urugamba inkundura.
Murabe mwese rero, kugira ngo mugere mwese ku musozo neza, kuko hari benshi bari kugamburura, bityo bakirengagiza ibikorwa byanjye, inzira twanyuranyemo zikomeye kandi zigoye ; bityo umwanzi akabatera umutima wo kwitera hejuru, bityo bagahinda ibyanjye kandi bakibagirwa ibyanjye vuba na bwangu.
Ni igihe rero umwanzi ari kugenda azimya ukwemera kwa benshi, kandi ari kugenda atera ubukayuke muri benshi mu by’ingoma y’Ijuru, kandi ibyiza twagabye kandi twahaye buri kiremwa muntu, bikagenda bikendera, akaba rero ari igihe cyo kwiyumvamo imbaraga, mugasubira ku gicaniro kandi mukiyumvamo imbaraga kuko iteka ryose ntahwema kubuzuzamo ububasha bwanjye n’ubwa Data, kugira ngo iteka ryose muhore mwiyumvamo iruhuko, kandi roho wanjye akomeze kubayobora, kubagenga no kubereka icyerekezo, kuko namubuganije muri mwebwe, kugira ngo ababere umuyobozi.
Ntimukiyobore kuko muyobowe natwe, kuko uwiyoboye atana amayira kandi uteze amatwi ijambo ryanjye n’irya Data, agatega amatwi Roho Mutagatifu, ntajya ayoba amayira.
Nimukomere rero kandi mukomeze kuba abanyabwenge, kuko twabahaye iby’ingenzi kandi by’agaciro gakomeye, kugira ngo mubikoreshe kurushaho kwitagatifuza kandi mu kurushaho kujya mu rukundo rwanjye n’urwa Data.
Ndi muri mwe kandi nkora byinshi muri mwebwe, hari byinshi mbakumirira kandi hari byinshi nigizaho mugatambukira ahabona, kuko ntazigera mbatetereza kandi ntazigera mbatererana.
Untabaje ndamutabara, unaniwe nkamwongerera imbaraga, nimunyereke rero intege zanyu aho ziri, bityo mbaramire kandi mbatere imbaraga.
Njye na Data twiteguye kuramira abacu bose, kuko ari igihe cyo gushungura ukwemera kwa buri wese ; ntimukagamburure kandi ntimukananirwe, kuko ijambo mwanyumvanye ntihazagire n’umwe uryibagirwa.
Ni igihe rero cyo kuzirikana ibyo mwahawe kandi mwazigamiwe kuva kera, kugira ngo buri wese atungwe n’ayo yavomye, kandi akomeze gutungwa n’ijambo ryanjye, uko bwije n’uko bukeye ribatere imbaraga kandi ribasubizemo icyizere.
Nimukomere kandi mukataze, nimwugarizwa n’amakuba n’amage, muzirikane ko mpari natsinze byose, ko ku musaraba ntawemye gucungura ndetse no gukora ibitangaza, mu kanya benshi babonaga y’uko ntacyo nshoboye gukora.
Nkaba rero naragaragaje urukundo rwanjye mu guhindura abari bankikije kandi mu gukorera igitangaza igisambo nkagiha ubuzima kandi nkagisezeranya Ijuru.
Ni igihe rero cyo gukomera no gukomeza urugendo, kuko mu gihe mufite intege nkeya ntimukumve y’uko byabarangiriyeho, ahubwo mujye mwigiramo ukwemera, mwumve ko mukomeye kuko nanjye nza nkabatera imbaraga, kandi nkabaha gutsindira aho mudakeka.
Imbaraga zanjye na Data zirabahagije, kandi ububasha bwanjye na Data burabahagije, mu kwemera no mu kwizera n’urukundo, niho muzaganza imbaraga zose zibahagurukiye z’umwanzi.
Nimugire ibihe byiza, ndabakunda cyane, ntore zanjye kandi ntumwa zanjye. Nimutambukane rero ishema n’isheja, kandi mutambuke mu rukundo rwanjye, mukomeze kurwambara kandi murwikwirakwize, kuko Isi yose yugarijwe n’amage n’amakuba, ibyago, ibigeragezo binyuranye, kubera urusobe rw’ibibi rwayibase, kandi kubera umwanzi yayigaruriye.
Ni igihe rero tubohereje kugira ngo mukomeze mutakambe kandi muyisabire guhinduka no guhindukira, kugira ngo abayirimo bamenye urukundo rwanjye, kandi bamenye urukundo rwa Data, wahanze kiremwa muntu, kandi ugahanga Isi n’Ijuru. Byose biri mu biganza byacu, kuko nta kiremwa tutashoboye guhindura, kuko nta na kimwe tutashobora guhagarika.
Ni igihe rero buri kiremwa cyose uri ku Isi muburira kandi mukebura, nk’umwami watsinze, kandi buri wese yiyumvemo ko agomba kurekura ikibi cye cyamuhambiriye, kandi akarekura ingeso mbi zose zamubase kandi akegukira inzira nziza y’ubutungane, kuko nta wutagomba kurekura kandi nta wutagomba guhinduka, kuko buri wese uri ku Isi uko yaba ari kose iryo jambo riramureba.
Igihe rero twagennye, twateguye njye na Data, umugambi twateguye wo guhindura byose bundi bushya, uwo tuzasangana ubucafu bw’umwanda kandi uwo tuzasangana ikibi akazakurwa mu mayira, kandi tukazahirika icyitwa ikibi icyo ari cyo cyose, kuko nta kurebera kandi nta kubembekereza ibikorwa bibi by’umwanzi bikomeje kwigaragambya mu bantu.
Ni igihe rero cyo kuzanira amahoro Isi, ni igihe cyo gutanga umutekano mu kiremwa muntu, kuko Mwene Muntu yahagijwe n’ibyaha bitagira ingano, bityo umwanzi akamwigarurira kandi akamwisasira, akamwiyorosa, akamugira igikoresho cye rero, akaba ariho tuje guhera, kugira ngo tuyungurure kandi dukure mu mayira, aho Sekibi yashinze imizi kandi yagize imbata ; kugira ngo abo bose tubakure mu mayira banze guhinduka maze abaduhesha ikuzo njye na Data.
Ni muri iyo nteguro rero njye na Data, ibanjirije ku bemera, kugira ngo barwane urugamba rw’ukwemera, bityo habe hategurwa amayira y’amaza yanjye na Data, kugira ngo tuze kwigaragaza mu Isi.
Nimukomere rero kandi mukataze kuko igihe ari iki, kandi imyiteguro tuyirimbanyije igeze kure kuri buri wese, akaba arindiriwe, ategerejwe, ari umuto ari umukuru, kuko nta n’umwe uzatwihisha, kandi nta n’umwe uzadutambukaho, kuko ibikorwa ntawe tuzatuma, ahubwo ari twe tuzikorera.
Ninde ushobora guhunga uburakari bwanjye na Data? Ninde ushobora kutuzamukana se? Cyangwa kuducecekesha, kuburizamo ibikorwa byacu? Imikorere yacu si nk’iya Muntu, kandi imigambi yacu si nk’iya Muntu. Murabe maso abatuye Isi, kuko muri mu biganza by’uwabaremye, Imana, Umugenga wa byose.
Ninde ushobora se kuburanya uwamubumbye ? Ko ibumba ridashobora kubaza uwaribumbye ngo wambumbiye iki?
Ni igihe rero tuje kuryoza buri wese icyo twamuremeye kuko atacyubahirije, kandi atagikoze, kugira ngo tumurebe inzira yagombaga guca, ko ariyo ataciye. Hahirwa rero abanyuze inzira dushima kandi dushaka, abo tubazigamiye ibihembo.
Abatannye kandi bagiye kure yacu, abo bakaba bazigamiwe ibihano, bakaba bagomba gukurwa mu mayira, kuko bariho batariho n’ubundi, kuko utabereyeho gusingiza no gukuza izina ryacu, mu guhindura Isi nshya no guhindura ibyanze guhinduka mu mutima we, ngo abirekure asezerere Shitani, kandi aharanire guhindura Isi, mu kuyigabamo amahoro, kuyitera amahoro, ahubwo Mwene Muntu agahora ateza intambara n’amatiku n’amakimbirane, ibyo byose tukaba tuje kubihagarika kandi tuje kubikura mu mayira, kuko tutaremeye Mwene Muntu gushoza intambara, ahubwo twamuremeye gutanga amahoro no guhindura Isi kugira ngo irangwe n’ibyiza.
Nimukomere kandi mukataze kuko tuje kwishyirira byose ku murongo, nta wuzadukoma imbere kandi nta wuzabura umugambi n’ibikorwa byacu, kuko twiyiziye kurangiza no kurandura imbaraga zose z’umwanzi zigaruriye Isi.
Nimugire ubuzima kandi mugire amahoro kuko njye na Data ibikorwa byacu tubirimo, kandi icyo twagambiriye kuva kera na kare, twategereje impinduka muri Mwene Muntu yanga kwisubiraho kandi yanga kugaruka ku murongo, none tukaba tuje kwisubiriza byose ku murongo, kuko nta wudusumbya imbaraga n’ububasha.
Mbifurije rero gukomera no gukataza, guhinduka muhindutse abatuye Isi mwese, kuko nta wushobora kwihisha ijisho ryacu, kuko twebwe turebera hose icyarimwe, kandi ibikorwa bya Muntu byose akaba nta n’umwe ushobora kwikinga, akaba nta n’umwe ushobora kutwihisha mu miterere ye, mu mikorere ye, mu myifatire ye yose tuyisoma.
Mbifurije ibihe byiza kandi mbifurije gukomera no gukataza mu nzira y’ukuri n’ubutungane, kuko buri wese ushaka umukiro ari ho tuzahurira, mu butungane, ari nako ahabwa ibihembo ateganyirijwe kandi ateguriwe.
AMAHORO, AMAHORO! NDABAKUNDA CYANE!
MBAHAYE UMUGISHA UBAKOMEZA KANDI NKOMEJE KWAGURA UMUTIMA WANJYE W’IMPUHWE KUGIRA NGO MWESE MWUGAMEMO, MURONKE AMAHORO ISI YABAVUKIJE.
AMAHORO, AMAHORO! NDABAKUNDA CYANE! NDI YEZU KRISTU W’I NAZARETI, UMWAMI W’ABAMI.
NIMUGIRE UBUZIMA KANDI MUGIRE KUBAHO MURI NJYE NA DATA. AMAHORO, AMAHORO! NDABAKUNDA CYANE!