UBUTUMWA BWA YEZU KRISTU BWO KU WA 30 UGUSHYINGO 2025
Nimugire amahoro n’ibyishimo byanjye Ntore Biremwa byanjye na DATA, mbifurije icyumweru cyiza kandi mbifurije gukomera no gukomeza kwakira ibyiza mbazigamira nabateguriye kuri uyu munsi mu ntangiriro y’ibikorwa bidasanzwe by’ububasha ndakumirwa kandi ububasha butavogerwa bwanjye na DATA, mu nteguro ikomeye kandi dukomeje mu buryo bwuzuye bwo gusanganira Ikiremwa Muntu ; mbambitse imbaraga kandi mbahaye gususuruka mu mitima yanyu kugira ngo ibyishimo byanjye biture muri mwe, ndabakunda kandi urukundo rwanjye ndusesekaje kuri buri wese kugira ngo mubereho kurwakira kandi rushinge imizi bityo muruvomerere n’abandi.
Mbifurije ibyiza byose bivubuka mu mutima wanjye kuko nawukinguriye bose kugira ngo bishyire bizane, bityo mbavomerere urukundo nyarukundo kandi mbavomerere ibyiza by’intabarika bivubuka mu mutima wanjye mutagatifu ; ndabakunda kandi ndabashyigikiye Ntore zanjye mwebwe muhora iruhande rwanjye mundangamiye kandi munshengereye, ndabakomeje kandi nkomeje kubasakazaho imbaraga zibafasha kurwana urugamba kugira ngo mugere ku mutsindo wanjye na DATA ; nabakoye inkwano ikomeye y’amaraso mbaha kunga ubumwe nanjye na DATA, mbafungurira amarembo y’Ijuru, ngaho rero nimukomere kandi mukomeze mwishyire mwizane n’ubwo hari byinshi bibaca intege kandi bibananiza mu rugendo rw’ubuzima ku Isi murimo, nimunsange kenshi mbabere iruhuko kandi mbabere umurengezi n’umutabazi kuko ntawe untakambira ngo atahe amara masa kandi ntawe ugera imbere yanjye ngo atahe amara masa.
Nkomeje intambwe ya buri wese kandi nkomeje kubahugura mu bitekerezo, mu bwenge ndetse no mu buhanga, kugira ngo mukomeze mube abahanga basobanukirwa ibyiza by’Ingoma y’Ijuru kandi mubibemo mu buryo bwimbitse kandi mu buryo budasanzwe ; erega nzi kandi nsobanukiwe buri umwe umwe muri mwe, kuko icyerekezo cyanyu n’injyana murimo ariko kandi ibibagora n’ibibananiza bikaba bitandukanye, buri wese mu muruho we kandi umutwaro umushikamiye umuremereye ndawuzi kandi nkomeje kubatera imbaraga mu rugendo kugira ngo mbakire kuko ndi iruhuko ryanyu ; mbakomeje rero mu bihe nk’ibi kandi mu bihe by’imyiteguro ya nyuma, kugira ngo mukomeze mucane amatabaza yanyu, isengesho ritaretsa ribarange kandi imitima yanyu irusheho gufunguka, kugira ngo isengesho mutura muhetse Isi yose rikomeze kuvomerera roho zanyu n’iz’abandi kuko ari cyo nabashyiriyeho kandi nabatoreye nabatoranyirije.
Nimwirinde rero umwanzi mu buriganya bwe kandi mwirinde ibishuko bye ibyo ari byo byose murwane urugamba mutazuyaza kandi mutareba hirya no hino, kuko iki gihe ari igihe cyo kugendera mu nzira imwe kugira ngo mukomere mu kwemera kandi mukataze mu rugamba no mu rugendo kuko nifuza ko mwemera ndetse mukongeraho n’ukwemera byisumbuyeho birenzeho kugira ngo mubashe gutsinda urugamba ; nimwirinde rero icyabatera kudandabirana kandi mwirinde icyabatera kujya kure y’urukundo rwanjye, kuko icyo nabasezeranyije nzagikora kandi DATA uko yabirahiye azabyuzuza mu buryo bwuzuye, kandi mu buryo budasanzwe ; nimube rero intwari ku rugamba zishikamye ku rugamba, mube mu murimo mwahamagariwe kandi mwatorewe, dore ndambuye ikiganza mbaha umugisha kuri uyu munsi w’icyumweru, kugira ngo mukomere mwitegure kunyakira kuko iki gihe ari igihe cyo kugira igishyika cy’ibyiza by’Ingoma y’Ijuru kandi gushishikarira guhinduka no guhindukirira Ijambo ryanjye n’irya DATA.
Mbifurije rero gukomera mu rugendo no mu rugamba kandi mbifurije gukomeza kuzirikana ibi bihe ko ari ibihe byo kuba maso kandi ibihe byo kwirunguruka no kwikebuka, kugira ngo mumenye intambwe yanyu aho muyerekeje ko ari ku Mana, hari byinshi bibahinda kandi bibarushya, ibyo byose mubishyire ku ruhande, inzira yanyu ibe yo kundangamira no kurangamira DATA, kuko igihe ntarengwa twagennye twateguye tuzuzuza imigambi yacu, si igihe rero cyo guhuga ahubwo ni igihe cyo gukomera mu isengesho kugeza igihe DATA yagennye yateguye cyuzuye kandi kigeze, buri wese ahagaze mu ruhande mwifuzamo ; ndabashimira rero umwete n’umuhate muhorana, kuko muhamagarwa mukitaba karame kandi mwakwerekezwa mu byiza by’ingoma y’Ijuru mukaza mutiganda kandi mukagendana umwete n’umurava ; harahirwa rero abasonzeye ubutungane, bakabugirira inyota mu buryo bwose kuko bazabugezwaho mu buryo bwuzuye kuko nanjye mfite ishyaka ryo kubareshya kandi kubiyegereza kugira ngo mbageze ku mutsindo wanjye na DATA.
Nimwakire gukomera no guhumurizwa kuko ineza n’urukundo rwanjye rukomeje gusakara muri mwe, bityo muharanire kubaka amahoro mu mitima yanyu bityo muyasakaze mu bandi, mwirinde icyo umwanzi yabateraho cyatuma mujya kure y’urukundo rwanjye cyabatera kwishishanya kandi cyabatera kujya kure y’icyo mbifuzaho kandi mbashakaho ; ndabamurikiye kandi ndabakomeje kuri uyu munsi mbifuriza ibihe byiza byo gukomera no gukomeza kuba intwari mu rugamba, kugira ngo murusheho kwiga kandi murusheho kumenya ubwenge kuko ari igihe cyo kugira ngo mutagatifuze roho zanyu n’imibiri bityo mbahuze nanjye na DATA mu mbaraga z’Ubutatu Butagatifu, kuko Roho wanjye akomeje gutembera kandi gusenderera Isi, anasakara muri mwe kugira ngo twifatikanye mu kuvugurura Isi kandi mu bikorwa bidasanzwe dukomeje kwenyegeza no kunyuza mu mibiri yanyu ; nimubeho rero mubereye itara abandi n’urumuri kandi imico n’imigenzo myiza ibarange aho muri hose, mutamatame intamo y’urukundo kandi mumenye kururinda no gucunga umutekano w’ibyiza mwahawe kandi mwagabiwe ; muririnde rero ko umwanzi hari ibyo yavangavanga cyangwa se yakwangiriza, ahubwo iteka ryose buri wese ahore ari maso mu kwikebura no kurinda no gucunga izamu rye, kugira ngo ibitotsi byose, icyaba icyasha icyo ari cyo cyose kiva ku mwanzi, kugira ngo kigire kure yanyu ; nanye rero mbabereye ku isonga ry’urugamba mbarwanirira kandi mbarinda, nimwemere kandi mwakire imbaraga mbagabira kandi mbaha kuko nganje muri mwe kandi niteguye kubagirira neza.
Ndabakunda Ntore Ntumwa zanjye na DATA kandi mbafite mu mugambi mwiza wo guhindura amateka y’ubuzima bwanyu kandi wo kubagaragariza imirimo n’ibitangaza mu buryo DATA yagennye kandi yateguye kandi ibikorwa byacu bikaba bikomeje kujya mbere mu buryo budasanzwe ; mbasesekajeho urukundo rwanjye, imbaraga, ububasha n’ubushobozi, nimukomere kandi mukomeze mukorane umwete n’umurava mu buryo bwuzuye, icyo nabazigamiye kandi nabateguriye kirahari kandi niteguye kucyuzuza no kugisohoza mu buryo budasanzwe ; mbifurije gukomera mu rugamba kandi gukomeza kuba intwari mu rugendo, kuko ndi mu ruhande rwanyu kandi nkomeje intambwe ya buri wese, kubasusurutsa mu kubatera ingabo mu bitugu mu guhuriza hamwe ibikorwa byacu n’ibyanyu, kuko twabashyiriyeho kugira ngo muhagararire ibikorwa byacu mu buryo bwuzuye mu bihe nk’ibi, dukorane kandi tugendane mu buryo bwo gutegura Isi mu bihe biri imbere kugira ngo DATA agire byinshi afungurira muri mwe.
Nimuhagarare rero ku rugamba neza kuko muri umuryango twihitiyemo kandi twitoreye, dushaka kugaragarizamo ikuzo n’ububasha bwacu, igihe kiraje rero kiregereje kugira ngo ibikorwa byacu byivugire mu buryo budasanzwe, n’ubwo kandi hari ibibaruhije n’ibibarwanya nimumenye yuko urugamba rutari rwasoza kandi urugamba rugomba no kurangira, kabone n’ubwo hari ibyabashikamira cyangwa byumva ko bibafiteho ijambo, ariko umunsi umwe wo kubicecekesha ntawe uzabasha gutera hejuru ngo yongere kubagiraho ijambo ; nimuhumure kandi mukomere mukomeze urugendo, mukomeze mwunge ubumwe nanjye na DATA, kugira ngo ibyo umwanzi yibwira cyangwa ashaka biteshwe agaciro, icyo twatangiye muri mwe kandi Ijambo ryanjye na DATA muri mwe ritazapfa ubusa, kuko tuzatuza ari uko dusohoje icyo twavuganye namwe mu gihe gikwiye kandi kiri ngombwa ; mbasesekajeho urukundo rwanjye iteka, mbambitse gukomera no gukomeza kuba intwari mu butumwa no mu rugamba, kuko ibyiza n’ibyishimo byanjye na DATA twabibuganije muri mwe kugira ngo bibafashe mu gukomera kandi bibafashe mu gukomeza kugendana natwe mu bikorwa bidasanzwe by’impinduka igomba kugaragarira mu Isi ; hari ababafasheho ijambo kandi bumva babafiteho ububasha, igihe rero cyo kubirindura kandi kwitsa no gucisha bugufi abo bose bakazarambarara kandi bagacishwa bugufi imbere yanyu ; akaba rero ari igihe cyo kugira ngo mukomeze mwizigamire imbaraga, mwizigamire ibyiza bizabafasha gutambuka mu bihe bikomeye, benshi bazaba bari guhekenya amenyo, batumvise ijwi ryanjye babereyeho kunsuzugura ndetse no gusuzugura Ijambo ryanjye n’irya DATA, mwebwe rero abo dusangiye mu bihe by’ibi by’isengesho mu buryo bwo gutamurura no kubaka imbaraga mu buzima bwa Kiremwa Muntu, ndazibakomereje kugera ku kadomo ka nyuma tugaragaje intsinzi, kugira ngo dutaramane kandi tugaragaze muri mwebwe ibirori n’ibyishimo by’abatsinze urugamba ; nimuhore muri maso mwitegure rero, imvune zanyu n’imiruho yanyu sinifuza ko yapfa ubusa kuko nifuza ko yabaviramo ibyishimo bikomeye kuko uwarushye akwiye guhembwa kandi uwababajwe akwiye guhozwa, mbatwaye rero ku mutima iteka ryose, nimwakire gukomera no gukomeza kuba intwari mu rugendo no mu rugamba, kuko ndi byose muri mwe kandi nkomeje kubavomerera imbaraga zanjye, ububasha n’impuhwe zanjye mbisendereje mu banyu ndetse no mu Isi yose muri rusange, kugira ngo mwishime kandi munezerwe kuko mbabereye igihozo n’ikiramiro kandi mbabereye byose mu buryo bwo kurwana urugamba, mu buryo bwo kubatsindira kandi mu buryo bwo kubahumuriza, kuko ndi ihumure ryanyu mu buryo busesuye.
MBIFURIJE UMUNSI MWIZA NDABAKUNDA, NDABASHYIGIKIYE, NIMUKOMERE MUKATAZE MU RUGAMBA, IMYITEGURO IKOMEJE KANDI IDASANZWE KURI BURI WESE, ICYO NIFUZA KANDI NSHAKA NI UKO BURI WESE YAHARANIRA ISUKU YA ROHO ; AMAHORO AMAHORO NDABAKUNDA IBIHE BYIZA, NDI YEZU KRISTU W’I NAZARETI, AMAHORO AMAHORO !