UBUTUMWA BWA MALAYIKA GABURIYELI BWO KU WA 12 KAMENA 2026
Nimugire amahoro yanjye n’aya DATA kandi mugire kubaho muri Nyagasani Yezu Kristu wabakunze, kuko nje mu buzima bwanyu kugira ngo mpindure kandi mbagaragarize ububasha bwanjye kuko mbagendereye kugira ngo mbinjize mu bubasha bw’Ijuru kandi mbagumishe mu gushaka k’Uhoraho Imana Umuremyi wa byose. Ntore z’Imana, nshuti nkoramutima za Nyagasani Yezu Kristu, nimukomere kandi mukomeze urugendo kuko mwa hawe byinshi kandi mukaba mwarahawe iby’ingenzi, bibinjiza mu rukundo rw’Imana kandi bikabagumisha mu bubasha bw’Ijuru, bityo nkaba nkomeje kuhaberekeza ndetse no kubagumisha mu rumuri rwa Nyagasani Yezu Kristu wabahawe kandi wabahaye byose, kugira ngo iteka ryose ahore abitambira kandi name iteka muzirikane igitambo nyabuzima yatanze kugira ngo mubeho kandi mugume muri urwo rukundo ubuziraherezo. Nimukomere kandi mukomeze urugendo mwishimane natwe kuko turi mu buzima bwanyu kandi nkaba nje mu mbaraga zikomeye kugira ngo mbahe kandi mbahaze ibyiza by’Ijuru ari nako mbagumisha mu rumuri rwa Nyagasani Yezu Kristu, kugira ngo muhore musenga kandi muhore mwambaza Imana ubutitsa.
Nimukomeze urugendo Uhoraho Imana yabatangije kugira ngo mukomeze mukataze kandi mukomere kuko ububasha bw’Ijuru ndetse n’imirimo y’Ijuru bikomeje kwigaragariza muri mwe, bikaba rero ari ibikorwa by’agaciro gakomeye gafite akamaro muri mwe kandi kabafitiye integuro y’ingenzi, kuko igihe nk’iki ngiki ari igihe kidasanzwe, kandi akaba ari igihe cy’ububasha bw’Ijuru bukomeje kwigarurira imbaga nyamwinshi, ndetse no kwirehereza bose ; mwahawe ku buntu namwe nimukomeze mutange ku buntu kuko uwabigaragarije kandi uri muri mwe afite byinshi kandi akomeje kuzuza byose mu buzima bwanyu, kugira ngo ibikorwa by’Ijuru ndetse n’imirimo y’Ijuru bikomeze byigaragarize muri mwe, bityo rero akaba ari ibikorwa by’agaciro gakomeye kuko mwafunguweho ab’ingenzi kandi mukaba mwarafunguriwe inzira kugira ngo mutambuke kandi mwisanzurire muri Uhoraho ; ngaho rero nimwambaze Imana ubutitsa kandi mukomeze mwakire imbaraga nshya, kuko iki gihe ari igihe kibakomeza kandi ari igihe kibinjiza mu bubasha bw’Ijuru ndetse no mu nteguro Ijuru ryateguriye Ibiremwa byose.
Mwarahiriwe kuko Uhoraho Imana yateguye kandi akabateganyiriza byose, akabambika imbaraga ze kugira ngo mubeho mu gushaka kwe kandi muhore iteka mwiteguye kwakira ibyo yazigamiye abamwemera kandi abamwizera, akaba ari igihe cyo kuzuza ndetse no gufungura amayira kugira ngo mutambuke kandi mwisanzure, muri ubwo bwisanzure rero mukaba mwarahawe inzira kandi mwarahawe icyerekezo nyamukuru kibinjiza kandi kibagumisha mu rumuri iteka ryose. Nkoramutima za Nyagasani Yezu Kristu, mwebwe mwashyikirijwe byose kandi mukaba mukomeje gutega ibiganza kugira ngo mwambikwe ububengerane kandi mugume mu murimo wa DATA, nimwambaze ubutitsa kandi muhore mwiteguye kwakira imbaraga nshya kuko urumuri rwa Nyagasani, ububasha bw’Ijuru bukomeje kubinjiza aheza ndetse no kubagumisha aheza, kugira ngo icyo muri cyo gikomeze cyigaragaze kandi ibikorwa by’Ijuru bikomeze byitamurure mu buryo budasubirwaho ; erega mwahawe umurage na DATA, nimukomeze mwakire rero izo mbaraga zibagumisha aheza akandi zibagumisha ku murimo mwashyizwemo kuko mwashyizwe mu muzabibu, kugira ngo muwukorere neza kandi muharanire kuba intumwa zitumwa kandi zigatumika.
Nabahaye urugero rwiza mbagenderera kandi na n’iyi saha ndacyabagenderera kuko nkomeje kubaherekeza mu rugendo rwanyu ndetse no kubereka igikwiriye n’igitunganye kugira ngo mugume mu bushake bw’Ijuru kandi muhore mwiteguye amaza ya Nyagasani, ngaho rero nimukomeze mwambaze ubutitsa kandi mugume mu rumuri ubuziraherezo, kugira ngo amatara mwacaniwe ahore yakirana muri mwe kandi namwe muhore iteka mushishikariye kumurikira abandi kuko mwagizwe abatwararumuri. Muri intumwa z’Imana mu buryo bwuzuye kuko mwahawe impamba kandi mukamenya icyo mugomba kuyikoresha mukayibyaza umusaruro, nimukomeze rero muharanire ikiri icy’ingenzi kandi mugume mu bubasha bw’Ijuru kuko Uhoraho Imana yabashyikirije byose kandi akaba yarabahaye imbaraga zikomeye zibinjiza mu bikorwa bifatika, kugira ngo igihe cyose muhugukire icy’ingenzi kandi mukangukire gusenga. Nimwakire rero ububasha bw’Ijuru kandimugume mu rumuri rwa Nyagasani ubuziraherezo, kugira ngo muhore mwiteguye kandi muhore muteganyirizwa iby’ingenzi kandi muhore muzi neza ko ari igihe cyo gutega ibiganza, kugira ngo mwakire ibyiza by’Ijuru, bityo mwirinde kubyubika kuko hariho benshi bagabirwa ariko ntibamenye ko bagabiwe kandi ntibamenye kubyaza umusaruro icyo bahawe. Mwebwe rero nimumenye kubyaza umusaruro icyo mugabirwa umunsi ku munsi kuko twururutse nk’abamalayika, abatagatifu bakaba bari iruhande rwanyu bityo tukaba tubatera imbaraga n’ubutwari, kuko tugendera mu bubasha bwacu kandi tukavugurura ibitavuguruye, tugashyira ku murongo ibitari ku murongo tugakosora buri kimwe cyose kugira ngo inzira y’ukuri n’ubugingo yigaragarize muri mwe kandi namwe murusheho kuyiyoboka.
Nimukomere rero kandi mukomeze urugendo, umugambi w’Ijuru wigaragarize muri mwe bityo iteka ryose icyo mufashe mugikomeze mwirinde kukirekura, kandi icyo mwahawe mugiharanire kuko ari igihe cyo kugira ngo ibyiza bya Nyagasani ndetse n’umuteguro w’Ijuru ukomeze utegurirwe mu buzima bwanyu bwa buri munsi. Ntore Ntumwa za DATA dutaramanye kandi twifatikanyije kuri uyu munsi, nezerejwe na benshi mukomeje gushakashaka ubutungane ndetse no gukomeza kwegera ameza ya Nyagasani kugira ngo muhazwe n’Ijambo rye, kandi muhazwe n’umubiri we n’amaraso ye, kuko ari igihe cyo kugira ngo ibyiza bya Nyagasani ndetse n’ibikorwa bya Nyagasani bitungukire muri mwe. Uyu ni umunsi udasanzwe wo kugabirwa kandi ni umunsi udasanzwe w’ibikorwa by’indashyikirwa Uhoraho Imana yohereje muri mwe no mu Isi yose muri rusange, bityo rero tukaba turi abahamya bo kubihamiriza kuko twabyakiriye bityo namwe tukaba twarabibasakajemo, kuri uyu munsi rero akaba ari igihe cyo kugira ngo mwishimire icyo mugezeho ndetse na benshi muri kugenda mutera intambwe mujya mbere kuko ububasha bw’Ijuru bukomeje kwigaragariza muri mwe, imirimo ya DATA ikaba ikomeje gufungurirwa mu buzima bwanyu.
Mwarahiriwe kuko mwamenye mugasobanukirwa n’imirimo ya DATA bityo mugaha agaciro umuteguro Ijuru ryateguriye muri mwe, nimukomeze rero mwishimire muri Nyagasani Yezu Kristu wabakunze mbere, kugira ngo ibikorwa by’Ijuru ndetse n’integuro Ijuru ryateguye muri mwe bikomeze byifungure kuko ari igihe cyo kubagura kandi akaba ari igihe cyo kubakomeza, kubarinda ndetse no kubaherekeza, akaba ari igihe cyo kubambika imbaraga kugira ngo igihe murimo cyo kurushanwa kandi cyo kugira ngo mutsinde, rwose mutsinde kandi mubashe kwakira imbaraga nshya kuko mwatsindiwe na DATA, kandi Kristu Nyagasani akaba ari we ubabereye umuhamya wa buri kimwe cyose kuko ari we ubafashe ikiganza, ndetse n’ubaherekeje mu rugendo wabahaye ubutumire. Nimwakire rero umugisha w’IMANA DATA, IMANA MWANA, IMANA ROHO MUTAGATIFU, kugira ngo uwo mugisha ubakomeze kandi ubagumishe mu rumuri iteka ryose, bityo iteka icyo musaba kandi icyo muhabwa mubashe kukibyaza umusaruro ndetse kandi kibagirire akamaro, kuko iki gihe ari igihe cyo gukanguka, ni igihe cy’ububasha bw’Imana bwururutse kuvugurura, kwiyoborera Isi, kwiyoborera u Rwanda n’Abanyarwanda, ndetse no kugaragaza ububasha kuri buri umwe umwe, kugira ngo buri wese koko abe mu bushake bw’Ijuru kandi agume mu rukundo rwa Nyagasani kuko ari igihe cyo guhindurirwa amateka ndetse no guhindura ibintu byose bundi bushya.
Nimwakire rero imbaraga nshya kugira ngo ibikorwa by’Ijuru bikomeze byigaragaze kandi byifungurire muri mwe bityo umurage wa DATA ukomeze wigaragaze kandi icyo muhawe mugikomeze mwirinde kurekura icyo mwahawe, kuko ari igihe cyo kugira ngo mukomeze kandi mufate neza umurage wanyu muwubyaze umusaruro kuko ari wo uzabageza aheza kandi ari wo uzabageza ku ihirwe. Nimukomere kandi mukomeze urugendo mwishimire muri Uhoraho Imana kandi mutaramane n’Ijuru ryose, natwe turishimye nk’abamalayika, cyane cyane kuko muhora iteka muhagaze ku izamu ryanyu kandi mukamenya gusabira imbaga nyamwinshi y’abatemera kandi mugashishikarira kubazana aheza ndetse no kubamenyesha iby’Ijuru, kugira ngo Ingoma y’Imana yamamare kandi ikwirakwizwe hirya no hino mu Isi.
NIMUKOMEZE MWAMBAZE UBUTITSA TURI KUMWE NDABAKUNDA, NIMWAKIRE IMBARAGA NSHYA KANDI MWAKIRE UMURAGE WA DATA KUKO NKOMEJE GUTARAMANA NAMWE NDI MALAYIKA GABURIYELI, AMAHORO AMAHORO, NSHUTI BAVANDIMWE NKUNDA, AMAHORO AMAHORO !