UBUTUMWA BWA BIKIRA MARIYA, TARIKI 14 UGUSHYINGO 2023
Mbasendereje umugisha wanjye bana banjye ngo ubashyigikire, kandi ubakomeze kuri uyu minsi kandi kuri iki gicamunsi, kuko nurururukiye kuza kwibanira namwe kandi nkaba nkomeje kugendana namwe mu bikorwa byanyu no mu rugendo rwanyu rwa buri munsi; bana banjye nkunda, nimushyigikirwe, kandi mukomeze gutera imbere mu rukundo rw’ Ijuru kandi mukomeze kwakira ibyiza mbazanira umunsi ku wundi, bityo ingabire n’ ingabirano mbahereza zirusheho kubagirira akamaro umunsi ku wundi, kandi zirusheho kugira inyungu mu buzima bwanyu no mu rugendo rwanyu rwa buri munsi; narabatoye rero kandi narabatonesheje, narabiyegereje kugira ngo mbamenyeshe Ibyiza by’ agatangaza kandi mbahishurire byose nta na kimwe mbakinze.
Bana banjye, nimuze iteka ryose mu mutima wanjye utagira inenge, muturemo kandi muhabonere byinshi byiza by’ agatangaza bibabeshaho muri iki gikorwa kandi muri uru rugendo rwanyu; naje kuvugurura Isi ndetse n’ abayituye, kandi naje guhindura byinshi mu Isi, kuko naje kwigizayo imigambi mibisha yose y’ umwanzi, kandi nkaba naraje gukumira ibikorwa bibisha byose by’ umwanzi, kugira ngo ibikorwa byanjye bigaragarire bose kandi mpindure imitima ya benshi, abinangiye bose nkaba nkomeje kuza kubagarura mu rukundo rwanjye, kandi abatana nkaba nkomeje kuza kubagarura, kugira ngo benshi mbinjize mu rumuri rw’ Imana kandi mbashyire mu rumuri rw’ Imana isumba byose, kuko iki ari igihe cyo kugira ngo twigarurire ibiremwa byinshi kandi tubohore ibiboshye kandi tuzahure abazahazwa n’ umwanzi umunsi ku wundi, uko bwije n’ uko bucyeye.
Iki ni gihe cyo kugira ngo nigarurire benshi kandi iki ni igihe cyo kugira ngo mbohore benshi, nifatikanyije namwe mu gukomeza kwambura umwanzi ijambo kandi mu gukomeza kuvuguruza imigambi mibisha yose y’ umwanzi, kugira ngo nkomeze mbashyigikire bana banjye, mbahe gukorana n’ Ijuru igihe cyose, kandi nigizeyo icyashaka kubagiraho ijambo icyaricyo cyose, kuko niyemeje gukumira kandi niyemeje gutsemba no kurindimura, kugira ngo ibikorwa by’ Uhoraho Imana bigaragarire mu Isi yose, ibikorwa by’ agatangaza, kuko twaje guhindura Mwene Muntu no kumuhindukiza, yabyumva atabyumva, yabyemera atabyemera, twaraje, ntabwo tuzasubirayo tudakoze icyatuzanye gukora, kuko tudakangwa na Muntu, cyangwa ngo Mwene Muntu ntiyashatse, ngo turareka gukora, ahubwo ntabwo tureka Mwene Muntu ngo agendere mu bwigenge bwe, ahubwo iki ni ighe cyo kugira ngo dushyire byose ku murongo, kandi buri kimwe cyose tukijyane ku njyana y’ uko tucyifuza, kuko iki ari igihe cyo kugira ngo umwanzi tumwambure ijambo aho yaryihaye, kandi aho agenda hose tuhamwimure kandi tuhamwirikane, bityo ibikorwa by’ Ijuru ryose bigaragare hose ndetse no muri bose.
Niyo mpamvu bana banjye, nkomeje kubahugura no kubigisha uko bwije n’ uko bucyeye umunsi ku wundi, ariko nkomeza kubana namwe, ari nako nkomeza kugendana namwe, kugira ngo mbamenyeshe byose kandi mbamenyere byose ndusheho kwigizayo ikibi cyose cyashaka kubavogera kandi ikibi icyaricyo cyose cyashaka kubagera amajanja, kugira ngo mbahe kubana nanjye muri byose kandi mbahe gutekana no kugubwa neza, mbururukirizeho umugisha n’ urukundo rw’ Ijuru. Nimwakire kuganza no kubaho no gukomera, iteka ryose mujye muhora muri intwari zikataje muri uru rukari, kuko nza kwifatikanyamo namwe mu gukomeza gutsemba kandi mu gukomeza kurindimura ikibi cyose, mu kwirukana umwanzi kandi mu gutsemba no mu gutsiritsiza ibikorwa bye bibisha, kugira ngo amahoro agwire kandi asagambe mu Isi hose. Mbahaye rero amahoro, nabuzure, ababemo, abasabemo iminsi yose, nanjye nzakomeza kubana namwe kandi nzakomeza kugendana namwe, mu bikorwa byanyu no mu rugendo rwanyu rwa buri munsi, nkomeze kubiyegereza, mbahishurira byose, mbamenyera buri kimwe cyose, mbamenyesha buri kimwe cyose.
Nihatsindwe kandi hatsiratsizwe umwanzi washaka kubagogera no kubavogera, kandi icyashaka kubagera amajanja icyaricyo cyose gitsindwe kandi gitsiratsizwe, bityo mukomeze kwibonera ku byiza by’ agatangaza mwateganyirijwe kandi mwateguriwe muri ubu buryo, mu gukomeza kugendana n’ Ijuru kandi mu gukomeza kubana n’ Ijuru umunsi mu wundi; mbahaye kugubwa neza kandi mbahaye gushyitsa imitima yanyu hamwe, kugira ngo mukomeze kurambura amaso yanyu, mwitegereze, mubone ibyiza by’ agatangaza mwagenewe kandi mwateguriwe muri iki gikorwa, muri uru rugendo, mu buryo bw’ agatangaza; bana banjye nkunda, narambuye amaboko yanjye kugira ngo mbuzuze imbaraga kandi mbasendereze ibyiza by’ agatangaza mbagabira kandi nabateganyirije, nabateguriye kuri uyu munsi; buri wese niyakire ingabire n’ ingabirano namugeneye kuri uyu munsi, kuko nta munsi w’ ubusa ujya ubaho, kuko iteka ryose iyo mbasanze kandi iyo mbagendereye Bana banjye, nza mbazaniye ikibatunga kandi ikibabeshaho mu buryo bwa roho, kandi nkakomeza kubahyira iruhande rwanjye kandi nkakomeza kubahugura kugira ngo mukomeze kubana nanjye na Jambo, kuko mporana namwe iminsi yose kandi nkagendana namwe, aho ndi Jambo aba ahari, kandi aho Jambo ari mba mpari, kugira ngo dukomeze ibikorwa byacu twubaka urukundo, amahoro, ubumwe n’ ubwiyunge, gushyira benshi mu rumuri rw’ Ijuru tubakura mu mwijima, kandi dusakaza muri bose ubutungane, kandi dutoza imigenzo myiza bose kandi tugashaka iteka ryose kubahugura no kubategura, kugira ngo muhore muri abanyabikorwa byiza kandi muhore muri abanyamigenzo myiza, bityo benshi bababonemo imbuto nziza kandi bababonemo icyitegererezo, bityo bakurizeho guhinduka no guhindukira, kuko iki ari igihe cyo kugira ngo duhindukize benshi kandi duhindure benshi, tubashyire mu rukundo rwacu.
Oya Mwene Muntu nta bwigenge afite, kandi Mwene Muntu ntabwo acyikomeyeho miri ki gihe, kuko twiyiziye n’ imbaraga zacu n’ ububasha bwacu, kuko tuje gukumira kandi tukaba tuje gukubura ikibi cyose tukacyigizayo, ibikorwa byacu akaba ari iby’ indashikirwa kandi akaba aribyo tuje gukomeza gutegekesha, kandi akaba aribyo tuje gukomeza gushyigikirisha, kandi tukaba tuje gukomeza kubishyira muri buri Muntu wese, kugira ngo uMuntu wese wihambiriye ku kibi abashe kukivamo, kandi uwicaye ku mwanda abashe kuwuhagurukaho, kuko iki ari igihe cyo gusobanurirwa kuri benshi kandi akaba ari igihe cyo guhumuka amaso kuri benshi. Bana banjye nkunda, ndabashyigikiye kandi ndabakomeje, nimukomeze mubeho mu rumuri rw’ Ijuru kandi muhorane imbaraga mu buryo bw’ Ijuru, nanjye nzakomeza kubaba hafi mu gukomeza gutsemba umwanzi kandi mu gukomeza kwigizayo ikibi cye icyaricyo cyose, kugira ngo mbatekanishe kandi mbatuze mu rukundo rw’ Ijuru mu buryo bw’ Ijuru budahangarwa kandi buhanitse cyane; bana banjye rero narabakinguriye, nimwinjire, kandi nabateguriye byinshi byiza by’ agatangaza, nimukomeze mukarabe intoki zanyu kugira ngo buri wese abyakire kandi buri wese abyakire asukuye, kuko ibyanyu ari ibyanyu, ntaho bizajya, kandi nta n’ uwundi tuzabihereza, kuko tutabeshya kandi tutabeshywa, icyo buri Muntu agenewe kandi icyo buri Muntu ateguriwe kirahari bana banjye, nta na kimwe muzabura kandi nta na kimwe muzamburana, kuko byose ndabifite mu biganza byanjye, kugira ngo mbihereze kandi mbigabire buri wese.
Nimwakire kubaho rero kandi mwakire gukomera no gukomeza urugendo, kuko nifatikanije namwe mu buryo bw’ agatangaza, kandi nkaba nkomeje gutsemba ikibi icyaricyo cyose, gukura mu nzira umwanzi, kandi mu gukomeza kuvogera imigambi mibisha y’ umwanzi kugira ngo aho iri hose nyikureho kandi nyigizeyo, kuko ndi umusukuzi mu Isi kandi nkaba ndi umubyeyi ukomeza gufata abana banjye kugira ngo mbarinde gutsikira no gutsitara kandi mbashyire mu rukundo rwanjye. Mwakire umugisha wanjye, ubabesheho kandi ubashyigikire iminsi yose. Bana banjye, nimwakire gukomera kandi mwakire kugubwa neza muri byose, ndi kumwe namwe, ndabarinze kandi ndabashyigikiye, nzakomeza kubakomeza no kubiyegereza, bityo mbamenyeshe byose kandi mbahishurire byose bana banjye.
Nimuze mukomeze kwifatikanya nanjye mu kurohora Isi ndetse n’ abayituye bana banjye, mukomeze kumbera abahuza b’ umutima wanjye ndetse ka Jambo, mu gukomeza kwambura umwanzi ijambo mu Isi kandi mu gukomeza kumuvuguruza twivuye inyuma, kuko ibi ari ibihe byo kugira ngo umwanzi tumwambure ijambo, kandi ibikorwa bye bibisha dukomeze kubikoma mu nkokora, kuko tutacyemereye umwanzi ubwigenge bwe, kandi tutacyemereye umwanzi kugira ngo yigenge mubyo yajyaga yigengamo, kuko tuje kumwambura ijambo, kumukumira no kumwigizayo, kugira ngo ibikorwa byacu tubikomeze kandi tubishyigikire mu Isi ndetse no muri buri Muntu wese. Mbahaye amahoro kandi mbahaye kugubwa neza, mbahaye kuzura urumuri iminsi yose bana banjye nkunda, twana twanjye natoye kandi natoranyije mu bandi, kugira ngo mbigishe, mbahugure, mbamenyeshe buri kimwe cyose. Nimube amahoro kandi mugire umugisha, mukomere kandi mukomeze urugendo, turi kumwe, nzakomeza kubarengera kandi nzakomeza kubarinda, kugira ngo nshigikire ibikorwa byanjye muri mwebwe, urukundo rwanjye ruhore iteka ryose ruganje muri mwe amanywa na nijoro. Rero ndi kumwe namwe, sinjya mbasiga, kuko iteka ryose nkomeza kubarinda no kubacungira umutekano, kugira ngo hatagira icyabangiriza aho kiva kikagera. Nimube amahoro kandi mukomeze gushyitsa imitima yanyu hamwe, nanjye nzakomeza kubarinda no kubarengera muri byose.
Amahoro, amahoro, ibihe byiza bana banjye, nimukomere kandi mugubwe neza, nifatikanyije namwe iminsi yose; nimukomeze kugira igicamunsi cyiza, ndi Mariya Nyina w’ Imana ubasendereje umugisha kandi ubambitse, kandi nkaba mbasize kandi nkaba mbateruye, nkaba nabahetse ku mugongo wanjye mugari uhetse Isi ndetse n’abayituye; uwo niwo mugongo muriho bana banjye, nkomeje umujishi kuri mwebwe, ntabwo nzabareka ngo mugwe cyangwa ngo mugwe isari, nzakomeza kubarengera muri byose.
Amahoro, amahoro, ibihe byiza, nimukomere, kandi mukomeze kugubwa neza, ndi kumwe namwe iminsi yose, ndi Mariya nyina w’ Imana, Umwamikazi w’Ijuru n’ Isi, ubabereye ku isonga kandi inyenyeri ibarangaje imbere muri uru rugendo, mu rugamba, nkaba niteguye gukomeza kubarwanirira, kugira ngo mutsinde kandi mutsembe icyitwa ikibi icyaricyo cyose, mugikure mu nzira, murusheho kuganza no gutekana, no kugubwa neza mu bikorwa byanyu no mu rugendo rwanyu rwa buri munsi.
AMAHORO, AMAHORO, NDABAKUNDA KANDI NDABASHYIGIKIYE BANA BANJYE, UMUNSI MWIZA, IBIHE BYIZA KURI BURI WESE, TURI KUMWE MURI IBI BIHE, KANDI MU RUGAMBA MURI IBI BIHE TURI KUMWE, NTIMUKAGIRE UBWOBA KANDI NTIMUGAKANGARANE, KUKO MBASHYIGIKIYE KANDI NKABA MBARANGAJE IMBERE MURI BYOSE; AMAHORO, AMAHORO UMUNSI MWIZA, NDABAKUNDA BANA BANJYE, AMAHORO.