UBUTUMWA BWA YEZU KRISTU, TARIKI 28 UGUSHYINGO 2023
Ndabakomeje kandi ndabashyigikiye mu rukundo rwanjye n’ urwa DATA, ntore, ntumwa zanjye; mbifurije umunsi mwiza kandi mbifurije ibihe byiza, amahoro yanjye n’ aya DATA nasendere mu mitima yanyu, kuko mbagwirije ibyiza by’ agatangaza kandi nkaba nkomezanyije namwe imirimo mu mbaraga zikomeye, kugira ngo nkomeze ngaragaze ububasha bwanjye, kandi nkomeze mbagaragarize urukundo rukomeye; mbifurije gukomerera mu rukundo rwanjye kandi mbifurije gukomeza kwambara imbaraga, uko bwije n’ uko bucyeye kugira ngo tugendane mu mirimo ikomeye kandi tugendane mu bikorwa bidasanzwe, byo kugaragaza ububasha bukomeye mu Isi yose kandi bwo gushimangira urukundo mu Isi yose, kugira ngo buri wese arusheho kugendera mu butungane kandi buri wese arusheho kugendera mu rukundo rwanjye n’ urwa DATA; ndabashyigikiye kandi ndabakomeje mu bubasha bukomeye kuko nkomeje guhigika ikibi, kandi nkaba nkomeje guhinda imbaraga zose z’ umwanzi, kugira ngo murusheho gutambukira ahakeye kandi ahasukuye, mutambukira mu rumuri rukomeye kandi rutamanzuye, kugira ngo mukomeze mureshye kandi murembuze Roho nyamwinshi, muzizana mu rukundo rwanjye kandi mubazana mu mpuhwe zanjye z’ igisagirane.
Ndi Jambo Nyir’ijambo kuko nganje mu biremwa byose kandi ijambo ryanjye rikaba ryigenga muri byose, nkaba nkomeje kurundarunda kandi guhuriza hamwe mu rukundo rwanjye rw’ igisagirane, kugira ngo buri wese yisanzurire mu byiza by’ Ingoma y’ Ijuru kandi buri wese anezerwe muri njye na DATA; nimuze murisanga kandi mwisanzurire muri njye, kuko nabahaye byose kandi nabeguriye byose, kuri uyu munsi nkaba nkoranye namwe imirimo ikomeye kandi nkaba nkoranye namwe ibikorwa bidasanzwe, gukomeza gutsemba imbaraga zose z’ umwanzi, dushimangira ububasha bwacu mu Isi yose, kuko ari umunsi w’ ibikorwa bidasanzwe kandi akaba ari umunsi w’ urugamba rukomeye, twagamburuje ibitero byose by’ umwanzi kandi twatsembye imbaraga z’ umwanzi mu buryo bw’ agatangaza.
Ni umunsi wo kwigaragariza benshi kandi ni umunsi wo guhishura ibikorwa bikomeye mu Isi yose, kugira ngo Mwene Muntu ukomeje gutana no gutandukira ava mu mayira twamushyizemo, arusheho kubona imbaraga zacu kandi arusheho kubona ububasha bwacu; ni umunsi twasakaje urumuri rukomeye mu Isi, kugira ngo buri wese uri hirya no hino, cyane cyane abakijandajanda mu bikorwa by’ umwanzi, kugira ngo tubacyebure kandi tubahindukirize, tubereke imbaraga zacu zikomeye kandi tubereke ububasha bwacu budahangarwa; Mwene Muntu yavogereye ibikorwa byanjye n’ ibya DATA, akomeza kugenda anyuranyuranya n’ ugushaka kwanjye na DATA, yihimbira ize nzira kandi yihimbira iye mibereho, igihe ni iki ngiki cyo kugaragaza ububasha bwacu bukomeye, kandi ni igihe cyo kugaragaza imbaraga zidasanzwe kugira ngo buri wese utuye Isi arusheho kugendera mu rukundo rwanjye, kandi arusheho kugendera mu byiza namuteguriye kandi namugeneye na DATA.
Hari integuro ikomeye twateganyirije Mwene Muntu kandi twateguriye Mwene Muntu mu buryo bw’ agatangaza, igihe kikaba kigeze cyo kugira ngo buri wese yinjizwe mu gushaka kwacu ku ngufu, cyane cyane abanangiye imitima, kandi abikomeyeho banze kumva no kumvira, banze guhinduka no guhindukira, bagakomeza kugendera mu bitekerezo byabo no mu gushaka kwabo mu marangamutima yabo, bagakururwa n’ Isi n’ ibyisi, umwanzi akabahenda ubwenge akabigarurira, igihe ni iki ngiki kugira ngo buri wese ayoboke ukuri kw’ ijambo ryacu kandi ayoboke ukuri kw’ ibikorwa byacu bidasanzwe, kuko tuje kugaragaza imirimo ikomeye mu Isi, kandi tukaba tuje kugaragaza ububasha budasanzwe.
Nimukomere ntumwa zanjye, ndi kumwe namwe muri byose kandi ndabashyigikiye, mu kugaragaza ububasha bwanjye bukomeye kandi mu kugaragaza imbaraga zanjye zidasanzwe muri mwe; nkomeje kubavomerera kandi nkomeje kubuhira mu buryo bw’ agatangaza, kugira ngo mugume mu nyanja y’ urukundo, ukwemera n’ ukwizera, kugira ngo nkorane namwe imirimo ikomeye, kandi nkorane namwe imirimo n’ ibitangaza.
Ntawe uzagera kuri DATA atanyuzeho kuko ndi inzira ngufi, kandi ntawe uza ansanga ngo atahe amara masa, kandi ntawe uza ansanga yikoreye imitwaro ngo ayisubiraneyo, kuko ndi Karuhurandushyi kandi ndi Umutabazi, ndi Umurengezi ku rugamba, uje ansanga wese ndamuruhura, bityo agatahana ihumure n’ iruhuko mu mutima we; nanjye ndi kumwe namwe, ndabashyigikiye kugira ngo buri wese arusheho kubona ijambo ryanjye muri we, kandi arusheho kwambara urukundo rwanjye rukomeye.
Nimukomere ndabakomeje, kandi ndabashyigikiye kuri uyu munsi w’ imirimo n’ ibitangaza mu Isi, twakoze imirimo ikomeye kandi twagaragaje ububasha bukomeye mu Isi yose, mu gucisha bugufi abikujije mu bubasha bwacu, mu guhananura abo bose bikujije bizeye ubwenge babo kandi bizeye imbaraga zabo, kuko hari benshi bakomeje gukururwa n’ ibikorwa by’ umwanzi, igihe akaba ari iki ngiki cyo kugira ngo dukomeze kugaragaza imirimo yacu kandi dukomeze kugaragaza ibikorwa byacu bidasanzwe.
Nimukomere ndabakomeje kandi ndi kumwe namwe muri byose, kuko mbayoboye ku rugamba, ntabwo njya mbashora mwenyine ku rugamba, mba ndi kumwe namwe kugira ngo nkomeze nkubite ibirura mbivane mu nzira, mutambukire ahacyeye kandi mutambukire ahasukuye, nkaba nkomeje kubongerera imbaraga z’ agatangaza, kandi nkomeje kubasendereza ububasha bukomeye, kugira ngo aho mutambutse hose aho munyuze hose, mwamagane umwanzi kandi mutsembe ikibi, kuko ari igihe cyo kubyiga ikibi cy’ umwanzi mu bubasha bukomeye kandi mu mbaraga zikomeye; ntabwo twakomeza kureberera agasuzuguro k’umwanzi, nta n’ ubwo twakomeza kureka Mwene Muntu yidegembya, agendera mu gushaka kwe; ni igihe cyo kuyoboka urukundo rwacu, kandi ni igihe cyo kugendera mu gushaka kwanjye n’ ukwa DATA.
Uwanze kumva kandi uwanze kumvira, uwanze guca bugufi, igihe kirageze ngo acishwe bugufi n’ ibikorwa byacu kandi igihe kirageze kugira ngo bumvishwe n’ ububasha bwacu bukomeye, kuko tuje gutwikurura kugira ngo tugaragaze imbaraga zidasanzwe, kandi tugaragaze ubuhanga buhanitse bw’ ibikorwa byacu. Nimwishime kandi munezerwe, ndi kumwe namwe muri byose, ndi Jambo Nyir’ijambo, kuko ntawe uzabafataho ijambo ntarimuhaye kandi ntamwemereye, nta kizababaho nta mpamvu, kuko nkomeje kubayobora mu nzira nziza, kandi nkaba nkomeje gutunganya amayira yanyu yose kugira ngo mutambukire ahacyeye, kandi mutambukire ahasukuye mu bikorwa bikomeye.
Mbifurije ibihe byiza, kugubwa neza, ngira nti nimukomerere mu rukundo rwanjye n’ urwa DATA, mukomeze kwizihirwa kandi mukomeze kunezerwa kuko mufite integuro nziza twabateguriye kandi twabageneye kandi igihe kikaba ari iki ngiki, cyo kugira ngo buri wese ahabwe ingororano ye kandi buri wese ahabwe ibyiza bye yakotaniye kandi yaruhiye igihe kirekire; iyo mukora ntabwo mukora ubusa, dukorana namwe ibikorwa bidasanzwe, kandi tugakorana namwe imirimo ikomeye mu Isi yose.
Turi kumwe rero mu minsi yose y’ ubuzima bwanyu kuko nkomeje kubana namwe muri byose, kugira ngo nkomeze mbayoboreshe imbaraga zikomeye kandi nkomeze mbayoboreshe ububasha budasanzwe; nimukomeze muyoboke urukundo rwanjye kandi mugendere mu gushaka kwanjye n’ ukwa DATA, kuko nabahaye byose kandi nabeguriye byose kugira ngo mwisanzure, mwishyire mwizane mu rukundo rwanjye rukomeye n’ urwa DATA; ku rugamba ntabwo muri mwenyine, kuko muri kumwe n’ Ingabo zose, Abatagatifu bose, mukaba muri kumwe n’ Umubyeyi wanjye Mutagatifu kuko ntatandukana nawe, akaba yizihiwe kandi anezerewe no kubana namwe; nkaba mbakomeje kandi mbashyigikiye, ngira nti nimukomeze mwizirike ku gishura cye, kuko akomeje kubarinda no kubarengera muri byose, kugira ngo umutsindo we ugaragarire Isi yose kandi ukomeze wigaragarize bose mu buryo bw’ agatangaza.
Ni igihe cyo kurundarunda kandi ni igihe cyo guhuriza bose mu rwuri, kugira ngo buri wese yishime kandi anezerwe, yishyire yizane mu byiza by’ Ingoma yanjye na DATA; ndabashyigikiye ntore ntumwa zanjye, kuko ngiye gukorana namwe imirimo ikomeye, kandi nkaba nje gukorana namwe ibikorwa bidasanzwe mu Isi yose mu kugaragaza ububasha bukomeye, no kugaragaza ibikorwa byanjye muri mwe bidasanzwe; nimutangire mwumve muri mwe imbaraga zidasanzwe kandi ububasha bukomeye, kuko nkomeje kubasendereza kandi nkaba nkomeje kubavomerera, kugira ngo muhore mwuzuye kuko ibicagate byose tuje kubizimya, kandi tuje kubivana mu nzira mu buryo bw’ agatangaza; Mwene Muntu azacikira he uburakari bwanjye n’ ubwa DATA kuko niyiziye mu mbaraga zanjye kandi nkaba nje kurangiza aya mahane kandi nje kurangiza iyi ntambara y’ umwanzi; ninjye na DATA twayitangiye, tuje kuyisoza mu buryo bw’ agatangaza kandi tuje kuyirangiza mu bikorwa byacu bikomeye, kuko tuje kugaragaza imbaraga zidasanzwe kandi tukaba tuje kugaragaza ububasha budahangarwa, kuko ntawe uzahangara ibikorwa byacu, igihe kirageze kugira ngo dukome ku mbarutsso tugaragaze byose, tugaragaze ko muyobotse ukuri mutayobye amayira, kuko benshi babibeshyaho, abo bose baragowe; buri wese ukomeje gukerensa ububasha bwanjye n’ ubwa DATA kandi ukomeje gukerensa ibikorwa byacu, igihe ni iki ngiki kugira ngo twigaragaze mu mbaraga zikomeye, kandi igihe kirageze kugira ngo turebane na buri wese ukomeje kubajora kandi ukomeje kubidegembyaho uko ashaka n’ uko yumva; tuje kuvana byose mu nzira kandi tuje guhigika, tuje kwigizayo mu bubasha bwacu bukomeye, kuko tuje kugaragaza imbaraga zacu zidasanzwe muri bose; tuje guhumura impumyi kandi tuje kujijura injiji, kugira ngo buri wese arusheho kugarukira urukundo rwanjye n’ urwa DATA kandi buri wese arusheho kutuyoboka, kuko ntawe uzihangira inzira nta n’ uzishakira imibereho, kuko tuje gutunganya kandi tuje kurangiza byose mu rukundo rwacu rukomeye.
Nimukomere ndabakomeje kandi ndabashyigikiye kugira ngo murusheho kugarura roho nyamwinshi, kuko hari benshi bakoreshwa uburetwa bw’ umwanzi kandi hakaba hariho abandi bakoreshwa ubucakara bw’ umwanzi, batabizi kandi batabisobanukiwe kubera kugendera mu kigare no mu kwaha kwa Mwene Muntu; tuje rero kuvana ibihato mu nzira kugira ngo abashaka gutambuka batambuke, kandi abakatarije mu rukundo rwacu bakataze, kuko turi kwambikwa imbaraga zikomeye, kandi tukaba turi kwambikwa ububasha budasanzwe, kugira ngo umutsindo wacu ukomeze wigaragarize Isi yose.
Naratsinze kandi nzakomeza ntsinde, kuko nkomeje gutsindira bose, ntawe mpeza nta n’ uwo nsubiza inyuma kuko umutima wanjye ufunguye kugira ngo buri wese aze, yishyire yizane muri njye kandi yishimire muri njye, kuko ndi ibyishimo kandi nkaba andi byose ku bamfite, abanyizeye kandi abankurikiye n’ umutima utaryarya.
Ntore ntumwa zanjye nimuhore mwicishije bugufi muri byose, muhore murangamiye Uruhanga rwanjye n’ Urwa DATA, kugira ngo dukomeze kubavomerera, kandi dukomeze kubuhira kuko tubateguriye ibyiza, bizabanezeza kandi bizabashimisha mu maso yanyu; nimuhorane ibyishimo kandi muhorane umunezero, nimwakire ubutoto kuri uyu munsi kugira ngo mutohagire mu byiza byacu, kandi munezerwe mu rukundo rwacu rukomeye.
Mbifurije ibihe byiza kandi mbifurije kugubwa neza muri njye na DATA turi kumwe, turabashyigikiye kandi turabakomeje mu bubasha bukomeye mu rugamba rudasanzwe, kuko turemye intambara, tukaba duhungabanyije ibitero byose by’ umwanzi, kandi tukaba dutsembye imbaraga zose z’ umubisha hirya no hino mu Isi kuko umwanzi yari yagabye ibitero kuri benshi, kandi akaba ari yigaruriye benshi mu buryo bukomeye, Mwene Muntu atazi kandi adasobanukiwe, kuko umwanzi afite amayeri menshi; ari kugenda runono ashaka abo yakwigabiza n’ abo yakwigarurira; iyi Si ni iyanjye na DATA kuko aritwe twahanze ibirimo byose, kandi akaba ari twe twahaye Mwene Muntu uburenganzira bwo kubyigengamo no kubyisanzuriramo; uwafashe nabi ibyo twamuhaye kandi uwakerensheje ibyo twamuhaye, igihe ni iki ngiki kugira ngo twambure, bityo twongere twambike bundi bushya, buri wese aberwe no kubaho mu rukundo rwacu rukomeye kandi abeho mu mbaraga zacu zidasanzwe.
Nimwambare ndabambitse mu buryo bw’ agatangaza kandi mbashyize ahirengereye, kugira ngo mukomeze muhonyore mukandagire ibitero byose by’ umwanzi kandi muhonyore imbaraga zose z’ umwanzi, kuko ari igihe cyo kumushyira mu gisuzuguriro gikomeye kugira ngo mumwereke ko nta bubasha afite, nta burenganzira afite bwo gukomeza kwidegembya mu Isi no kwidegembya ku kiremwa muntu; mbifurije ibihe byiza, kandi mbifurije kugubwa neza, ndi kumwe namwe muri byose kandi ndabashyigikiye mu bubasha bukomeye; NDI YEZU KRISTU W’ I NAZARETI, UMWAMI W’ ABAMI, JAMBO WIGIZE UMUNTU NKEMERA KUBANA NA MWENE MUNTU, KUBERA URUKUNDO RWANJYE NDENGAKAMERE, KANDI KUBERA IMPUHWE ZANJYE Z’ IGISAGIRANE.
NIMWISHIMIRE MURI NJYE KANDI MUZE MWISANGE MU MUTIMA WANJYE MUTAGATIFU, KUKO NAWUFUNGURIYE BOSE KUGIRA NGO MUZE MWISHYIRE MWIZANE KANDI MUZANE IMBAGA NYAMWINSHI, MUYIHEREREZA MU RUKUNDO RWANJYE KUGIRA NGO BURI WESE YAKIRE UMWUKA MUZIRANENGE W’ URUKUNDO RWACU RUKOMEYE.
AMAHORO, AMAHORO, IBIHE BYIZA, MBIFURIJE KUGUBWA NEZA NO GUTEKANIRA MU RUKUNDO RWANJYE, AMAHORO, AMAHORO!