UBUTUMWA BWA MUTAGATIFU MARITA BWO KU WA 09 GICURASI 2026
Nimugire amahoro y’Uhoraho Imana Ntumwa z’Imana bana b’Imana dutaramanye kandi twifatikanyije muri aka kanya, nje mbasanga kugira ngo mbasanganize urukundo rwanjye kandi mbubakemo imbaraga z’Ijuru, kuko nje muri mwe kugira ngo nkomezanye namwe uru rugendo. Nshuti z’Imana kandi nshuti bavandimwe nkunda, nimugubwe neza kuko Uhoraho Imana yabahagije ibyiza bye kandi akabafungurira amarembo, kugira ngo mwisanzure kandi muvome imbaraga zibaganisha ku butoneshwe. Nimube mu rugamba kandi mururwane inkundura kuko intwaro zo gukoresha zose muzifite, kandi koko mukaba mwarahawe byose : ubwenge, ubumenyi, ubuhanga, kugira ngo muhishurirwe amabanga yose kandi icyo mwahawe mukaba mwarabashije kugikoresha mu buryo bukwiriye kandi mu buryo buramba. Nimwakire ubwenge rero bubafasha gukomeza kubaho mu gushaka kw’Imana, kugira ngo icyo mwateguriwe kandi icyo mwazigamiwe mucyakire kandi kibafashe gutsinda. Twaje kuri uyu munsi kugira ngo tubataramishe mu buryo bwo kubateza intambwe ndetse no kubashimira intera n’intambwe buri wese ari guharanira gutera, kugira ngo icyerekezo murimo koko kibagumishe mu rukundo rw’Imana ubuziraherezo.
Muri abagenerwamurage kuko mwahawe iby’agaciro gakomeye, igihe nk’iki rero akaba ari igihe cyo gukomera ndetse no gukomeza urugendo, natwe turi rwagati yanyu mu buryo bwo kubambika imbaraga kuko tuzi neza ko kuba mu Isi bitaboroheye, kandi tukaba tuzi neza ko harimo ibishuko byinshi ndetse n’ibigusha byinshi ; ariko ku bemera turabarwanirira kandi tukabatsindira, kuko tubafata ikiganza kandi tukabateza intambwe mu buryo bukomeye, ahazamuka tukabafata ikiganza kugira ngo mutanyerera. Dukomeje kubabera byose rero nk’uko mwambereye inshuti, mukakira amabwiriza n’amatangazo y’Ijuru mu buryo bwuzuye ; nabatoje byose kandi mbaganisha mu nzira y’ubutungane, mu kumvira kwanyu bibageza aheza ari nayo mpamvu mwahurijwe hamwe mu ngoro ntagatifu kugira ngo muhore mutaramiye Umuremyi wa byose. Urukundo rwe ruhora muri mwe kuko ari rwo rubahihibikanya rukabashoboza ibyo mwebwe ubwanyu muba mutabasha gushobora, kandi iteka ryose mugasobanukirwa ibyo abandi bananiwe.
Mwazibuwe amatwi kugira ngo mwumve kandi mwumvire mu buryo bufatika, bityo benshi mu Isi bakaba batabasha kumenya ikibakomeje ndetse n’ikibahagaritse, ariko mwabarushije ibanga rikomeye ryo kumenya Uhoraho, bityo rero akaba ari byo bibakomeje muri uru rugendo kandi bibaherekeje muri ubu buzima. Nimukomeze rero mwakire uwo mugabane udasanzwe mwagabiwe na DATA, kandi mukomeze mwakire ibyiza by’Ijuru kuko ari igihe cyo gusabana naryo mu buryo bwuzuye. Erega n’aho muri iyi Si mwahura n’imvune n’imiruho mu buryo butangaje, ariko imbere muri kwerekeza ni heza, kandi mwahazigamiwe byinshi by’agatangaza. Kristu Nyagasani yabateguriye ibyicaro mu buryo bufatika, kandi buri wese azahatekanira atabyigana n’undi ; nimuharwanirire rero mu buryo bwo kwerekeza kugira ngo muzahabe mutuje kandi mutekanye, kuko burya muzi ko namwe Ijuru riharanirwa. Namwe rero muri gukotana kugira ngo icyo mwazigamiwe mukigereho rwose, kandi hari byinshi mwarangije gushyikira mu buryo bwuzuye.
N’ubwo akenshi na kenshi mureba hirya no hino mukabona ko ibibugarije bigihari, ariko byinshi twarangije kubikura mu nzira kugira ngo mubeho mu mudendezo ; nimuhumure rero turi ku rugamba rwanyu kandi turi ku rugamba rwa Kiremwa Muntu, bityo tukaba twifatikanyije namwe kuko mwashyizwe ku rugamba nk’abasirikare batojwe kandi mukaba muzi icyo mugomba guharanira. Nimukomeze rero mube ku izamu ryanyu neza mu buryo bwuzuye kandi mu buryo bufatika, bityo mwishimire ko mwategereje kandi mukaba koko murindiriye ugushaka kw’Imana ko kuzuzwa mu buzima bwanyu. Hari intera n’intambwe mwateye mu buryo bwuzuye kandi mu buryo budasubirwaho, ari nayo mpamvu kuri uyu munsi kuba mugihagaze kandi kuba mukiri mu byimbo by’aho tubifuza, ni uko mwakiriye ugushaka kw’Imana mu buzima bwanyu, kandi mukaba mukomeje kuguhagararamo mu buryo bwuzuye. Nimwirinde ikibi n’icyaha cyabatandukanya n’urukundo rw’Imana, ahubwo imitima yanyu ihore ikereye kwambaza Izina ry’Imana ubutitsa.
Nimutege amatwi mu buryo bwose kuko mu gutega amatwi muhakura ibisubizo, mu gutuza ndetse no mu gutekana mukahakura umugisha ; nimwakire rero umugisha mugabirwa n’Ijuru mu buryo bufatika kandi mu buryo buhoraho, kugira ngo natwe nk’abatagatifu duhore twishimanye namwe ; erega tubatera inkunga kandi tukaza kubana namwe kugira ngo mudatsikira, aho munaniwe tukabatwaza kugira ngo mutagwa mu nzira, nimusubize amaso inyuma murasanga hari henshi mwakuwe kandi mwavanywe, ari nayo mpamvu umunsi ku munsi duhora tubateza intambwe kugira ngo hatagira usubira inyuma mu bibi yavuyemo. Ngaho rero nimukomeze mukataze mugane imbere murashyigikiwe kandi ububasha bw’Ijuru burabatwikiriye, imbaraga z’Ubutatu Butagatifu zirabakikije kuko zikomeje kwiyongera mu buzima bwanyu bwa buri munsi ; nimusenge ubutaretsa kuko isengesho ryanyu rifite icyo rivuze mu bikorwa byacu nk’ab’Ijuru kandi rikaba rifite icyo rikora mu Isi, cyane cyane muri byinshi umwanzi ari kugenda yangiza mu Isi, uko musenga mushyize hamwe kandi mwunze ubumwe n’Ijuru, niko twifatikanya namwe mu gushwanyuza ibikorwa byose by’umwanzi.
Turi mu rugamba rero rwo gutsemba burundu kandi rwo kwamagana ikibi, kugira ngo Isi ibeho mu mutuzo kandi mu mutekano ukomeye cyane, nimwishimirwe n’Ijuru natwe turabishimiye mu buryo bwuzuye, nimukomeze mutege ibiganza kugira ngo icyo mwateganyirijwe kuri uyu munsi mugishyikire kandi kibafashe gutunganya byose mu buryo bunogeye Umuremyi wa byose. Ndabakunda Ntore Ntumwa za DATA, ndabishimiye nshuti bavandimwe nkunda, nimusizane musanganira ibikorwa by’Ijuru kandi mukomeze mutere intambwe mujya mbere kuko murindiriwe rwose ; mbifurije kugubwa neza no guhora ku izamu, bityo umwete wanyu mu gukora ikiri cyiza uhore wiyongera, bityo icyatuma mutezuka ntimukore icyo mushinzwe mukigizeyo, kuko nkomeje kubatera inkunga kandi nkomeje kubafatira iry’iburyo, kugira ngo urumuri rw’IMANA DATA rukomeze rubarasirizeho. Mbifurije umunsi mwiza Ntore z’Imana dukunda, nimukomere kandi mwakire umugisha w’Imana, kugira ngo ubasigasire kandi ubaherekeze mu butumwa murimo muri ibi bihe, ndetse no mu bihe bizaza.
MBIFURIJE UMUNSI MWIZA NDABAKUNDA NDI MUTAGATIFU MARITA, AMAHORO AMAHORO NSHUTI BAVANDIMWE NKUNDA, AMAHORO AMAHORO !